նախընտրելի դարձնել
Կիրակի օրը Հյուսիսային Կորեան հայտարարել է, որ Ճապոնիայի միջուկային հավակնությունները «պետք է կանխվեն ցանկացած գնով», հայտնում է ՑՏԱԿ-ը։
Փհենյանը նշել է, որ այս հայտարարությունները վկայում են այն մասին, որ Տոկիոն «բացահայտ ցուցադրում է միջուկային զենք ունենալու իր հավակնությունները՝ անցնելով կարմիր գիծը»։
«Միջուկային զենք օգտագործելու Ճապոնիայի փորձը պետք է կանխվի ցանկացած գնով, քանի որ դա մարդկությանը մեծ աղետ կբերի», — ասել է Հյուսիսային Կորեայի ԱԳՆ ճապոնական ուսումնասիրությունների ինստիտուտի տնօրենը։
Ըստ նրա սա «ոչ թե խեղաթյուրում կամ անպատասխանատու պնդում է, այլ Ճապոնիայի միջուկային զենք ստեղծելու վաղեմի հավակնությունների հստակ արտացոլում»։
Պաշտոնյան հավելել է, որ եթե Ճապոնիան ձեռք բերի միջուկային զենք, «Ասիայի երկրները կկանգնեն սարսափելի միջուկային աղետի առաջ, իսկ մարդկությունը՝ մեծ փորձանքի»։
Փհենյանի արձագանքը հետևել է այն բանից հետո, երբ հինգշաբթի Kyodo News-ը մեջբերել էր Ճապոնիայի վարչապետի գրասենյակի անանուն պաշտոնյայի խոսքը․ «Կարծում եմ, մենք պետք է ունենանք միջուկային զենք»։
Ըստ հաղորդման, այդ պաշտոնյան մասնակցել է Ճապոնիայի անվտանգության քաղաքականության մշակմանը։ Նույն հոդվածում նաև մեջբերվել է աղբյուրի այլ արտահայտություն․ «Ի վերջո, մենք կարող ենք ապավինել միայն ինքներս մեզ», բացատրելով միջուկային զենքի անհրաժեշտությունը։
