Ուկրաինայի էներգահամակարգում տեղի ունեցած լուրջ խափանումների պատճառով շաբաթ օրը՝ հունվարի 31-ին, տեղական ժամանակով 10:42-ին, Իսակչա-Վուլկանեշտի-ՄԴԷԿ 400 կՎ գծում լարումն ընկել է, ինչը հանգեցրել է Մոլդովայի էներգահամակարգի վնասմանն ու անջատմանը. հայտնում է երկրի էներգետիկայի նախարարությունը։

Էլեկտրաէներգիայի հաղորդման համակարգի օպերատոր Moldelectrica ընկերությունն աշխատում է իրավիճակը շտկելու ուղղությամբ, որոշ վայրերում լարումն արդեն վերականգնվել է, հայտնել են գերատեսչությունից։

Ըստ մոլդովական Newsmaker լրատվամիջոցի, էլեկտրաէներգիան անջատվել է առնվազն Քիշնևում և հարակից բնակավայրերում (Ստավչենի, Դուրլեշտի, Վատրա), ինչպես նաև Տարակլիայում, Կահուլում և Նովիե Անենիում։

Ուկրաինայի էներգետիկայի նախարար Դենիս Շմիգալն իր հերթին պարզաբանել է, թե ինչու է թե՛ Մոլդովայում, թե՛ Ուկրաինայում լույսն անջատվել։

«Այսօր ժամը 10:42-ին տեղի է ունեցել տեխնոլոգիական խափանում՝ Ռումինիայի և Մոլդովայի էներգահամակարգերի միջև 400 կՎ հզորությամբ գծի և Ուկրաինայի արևմտյան ու կենտրոնական հատվածների միջև 750 կՎ հզորությամբ գծի միաժամանակյա անջատմամբ։ Սա հանգեցրել է Ուկրաինայի էներգահամակարգում կասկադային անջատման և ենթակայանների ինքնաշխատ պաշտպանության համակարգերի գործարկմանը։

Ատոմակայանների էներգաբլոկները դուրս են բերվել շահագործումից։ Ներկայումս Կիևի, Ժիտոմիրի, Խարկովի մարզերում և Կիև քաղաքում կարգավարը կիրառում է վթարային անջատումների հատուկ գրաֆիկներ։ «Ուկրէներգոյի» մասնագետներն աշխատում են էլեկտրամատակարարման վերականգնման ուղղությամբ։ Առաջիկա ժամերի ընթացքում լույսը կվերականգնվի»,- նրա խոսքն է մեջբերում «Радио Свобода»-ն։