Թերթը գրում է, որ ըստ պտտվող լուրերի՝ բավական երկար ժամանակ է, ինչ «Հայաստան» հանրախանութի սեփականատեր Հայրապետ Հայրապետյանը վաճառքի է հանել իր բիզնեսները։
«Ու չնայած նրան, որ Հայրապետյանին պատկանող որոշ բիզնեսների վաճառքի մասին գովազդը արդեն հայտնվել է ռադիոկայաններում, այնուամենայնիվ, լուրեր կան այն մասին, որ Հայրապետ Հայրապետյանը մտադիր է վաճառել Հայաստանում ունեցած իր բոլոր բիզնեսները, քանի որ վերջինս լուրջ մտադրություններ ունի այնպիսի բիզնես պրոեկտներ իրականացնել արտերկրում, որոնք կարող են իրեն ավելի մեծ ու ապահով եկամուտներ բերել։ Ի դեպ, Հայրապետյանը մի քանի օր է, ինչ էլի գործնական այցով մեկնել է արտերկիր, որտեղ իր պարտնյորների հետ միասին քննարկում է Դուբայում մեծ առեւտրի կենտրոն կառուցելու եւ եւս մի նոր գործարան կառուցելու հարցը։ Թե ինչքանով կհաջողի Հայրապետյանին դրսում ամրապնդվել եւ մեծ եկամուտներ ապահովել, առայժմ չենք կարող ասել, բայց թե ինչ պատճառներից ելնելով է կուսակցական պատկանելությամբ ԲՀԿ–ական Հայրապետ Հայրապետյանը որոշել վաճառել իր բիզնեսները եւ գործնական կապերով տեղափոխվել արտերկիր, պարզաբանման համար զանգահարեցինք հենց Հ. Հայրապետյանին, սակայն վերջինիս բջջային հեռախոսն անպատասխան մնաց, քանի որ ողջ օրվա ընթացքում Հայրապետյանն այդպես էլ ժամանակ չգտավ զանգերին պատասխանելու։ Դե իսկ ԲՀԿ–ից էլ որեւէ մեկը չցանկացավ այս հարցի մեջ մտնել, քանի որ, ըստ որոշ ԲՀԿ–ականների, դա իրենց «պազիցիայի» մեջ չի մտնում»,- գրում է «Իրավունք»-ը։
