Իտալիայի բանտային հիվանդանոցում նոյեմբերի 17-ին՝ 04:00-ին, մահացել է ամենաազդեցիկ եւ չարամիտ մաֆիոզիներից մեկը՝ Սալվատորե (Տոտո) Ռիինան, որը հայտնի է Գազան եւ Կարճլիկ մականուններով, գրում է Corriere della Sera- ն: Նա վերջինն էր, ով «Բոսսերի բոսս» կարգավիճակն ուներ երբեմնի հզոր սիցիլիական կոզա նոստրա մաֆիայի մեջ: Քննիչները կարծում են, որ Ռիինան ներգրավված է հարյուրավոր սպանությունների մեջ:
Կորլեոնե քաղաքի (Պալերմո նահանգ) բնակիչ Տոտո Ռիինան մահացել է Իտալիայի Պառմա քաղաքում 87 տարեկան հասակում: Ռիինան երկու վիրահատություններից հետո վերջին օրերին կոմայի մեջ էր գտնվում: Իտալիայի արդարադատության նախարար Անդրեա Օրլանդոյի համաձայնությամբ մահացող «կնքահորը» տեսնելու թույլտվություն ունեին միայն նրա հարազատները, հաղորդում է Newsru- ն:
Ավելի վաղ Ռիինայի փաստաբանները բազմիցս դիմել էին Իտալիայի Վճռաբեկ դատարան նրան ազատելու խնդրանքով, որպեսզի մահացու հանցագործը «արժանապատվորեն մահանալու» հնարավորություն ունենա: Տոտոն տառապում էր մի շարք ծանր հիվանդություններից `քաղցկեղ, Պարկինսոնի հիվանդության եւ սրտանոթային հիվանդություններ: Այնուամենայնիվ, բոլոր նման միջնորդությունները միշտ մերժվել են, հաղորդում է ՏԱՍՍ-ը:
Սալվատորե Ռիինան, որը Կարճլիկ էր անվանվել իր կարճ հասակի պատճառով (ընդամենը 1.58 մետր) մաֆիայում իր կարիերան 18 տարեկան հասակում սկսեց: Այդ ժամանակ նա սովորական մարդասպան էր: 1958-ին Տոտոն մասնակցել է կոզա նոստրայի ղեկավար Միքելե Նավարայիի սպանությանը:
Նավարրայի սպանությունից հետո սիցիլական մաֆիայի «բոսսերի բոսս» դարձավ Լեջիոն, որը 1974-ին կալանավորվել եւ դատապարտվել էր: Այդ պահից Ռիինան դարձավ կոզա նոստրայի փաստացի առաջնորդը:
Կարճլիկը դարձավ կոզա նոստրայի ամբողջ պատմության ամենավտանգավոր եւ ցինիկ առաջնորդը: Մի անգամ նա հրամայեց 13-ամյա մի տղայի սպանել, ինչը նույնիսկ մաֆիայի ներկայացուցիչների դժգոհությունը առաջացրեց:
Տոտոն կարող էր մարդուն ընթրիքի հրավիրել, սակայն իր ընդգծված սիրալիրոթյունը եւ հյուրասիրությունը մահվան դատավճիռ էին նշանակում:
Դա նրա ոճն էր՝ ստիպել մարդուն թուլանալ եւ ամենանսպասելի պահին խեղդել:
Արտաքնապես սակայն ոչինչ չէր երեւում նրա դաժանությունից:
«Նա շատ կրթված եւ ուշադիր է», - այսպես էին նրա մասին ասում մերձավորները:
1981-1983թթ.-ին Իտալիայում հակամարտություն բռնկվեց, որը Կլանի երկրորդ պատերազմ անվանումը ստացավ: Այս քրեական պատերազմի ժամանակ Ռիինա եւ Պրովենցանո մաֆիոզները իրենց վերահսկողության տակ վերցրեցին ամբողջ կոզա նոստրան:
Նույն ժամանակահատվածում՝ 1982 թ.-ին, Ռիինային բռնելու փորձ կատարեց կարաբիներների առաջնորդ Կարլոս Ալբերտո Դալա Քյեզան: Չորս ամիս անց նա փողոցում իր կնոջ հետ սպանվեց մարդասպաների կողմից: Այդ ժամանակ Կարճլիկից սկսեցին վախենալ նույնիսկ ԱՄՆ-ում: Վաշինգթոնը Ռիինային անվանել է աշխարհի ամենավտանգավոր հանցագործ, գրում է The Daily Mirror- ը:
Մաֆիայի ներսում իր իշխանության ամրապնդումից հետո Ռիինան իսկական ահաբեկչություն սկսեց:1984-ի դեկտեմբերի 23-ին Նեապոլ-Միլան գնացքում պայթյուն տեղի ունեցավ: Զոհվեց 16 եւ վիրավորվեց 266 մարդ: Այդ պայթյունը «Ամանորյա սպանդ» անվանումը ստացավ:
1900-ականներին իտալացի իրավապահները կարողացան մեծ հաջողություններ ունենալ մաֆիայի դեմ պայքարում: Դատավոր Ջովանի Ֆալկոնեն մաֆիայի մի քանի ղեկավարներին համոզեց խախտել կոզա նոստրայի «պատվի օրենսգիրքը» եւ քննիչների հետ համագործակցել:
1992-ին տեղի ունեցավ այսպես ասած Մեծ գործընթացը, որի ժամանակ 474 մարդուց 360-ը հանցավոր գործունեության մեջ մեղավոր ճանաչվեցին:
Մաֆիայի շատ ղեկավարներ ցմահ ազատազրկման դատապարտվեցին:
Դրան ի պատասխան՝ Ռիինան Իտալիային պատերազմ հայտարարեց՝ սպանելով դատավորների, դատախազների, ոստիկանների եւ քաղաքական գործիչների:
1992-ի մարտի 12-ին սպանվեց խորհրդարանական Սալվո Լիման: Մայիսի 23-ին ճանապարհին տեղադրված հզոր ռումբի պատճառով մահացավ Ջովաննի Ֆալկոնեն: Նրա հետ միասին մահացավ իր կինը, որը նույնպես դատական համակարգի աշխատակից էր եւ նրանց պահպանող երեք ոստիկանները:
Ֆալկոնեի լավագույն ընկերը եւ մաֆիայի դեմ պայքարող դատախազ Պաոլո Բորսելլինոն երկու ամիս անց՝ 1992 թ. հուլիսի 19-ին, պայթեցվեցին մեքենայի մեջ:
Ռիինան 1993-ի հունվարի 15-ին ոստիկանների կողմից կալանավորվեց:
«Պարոնյաք, դուք մեծ սխալ եք գործում», - այսպիսի բառերով նրանց դիմավորեց Կարճլիկը:
Մինչ այդ նա 24 տարի թաքնվում էր իրավապահ մարմիններից:
Նա մեղադրվեց 40 սպանությունների համար, որոնք նա անձամբ էր գործել: Իսկ քննիչները կարծում են, որ նա առնվազն 150 պատվիրված սպանությունների հետեւում է կանգնած:
Նրան 26 տարվա ազատազրկման դատապարտեցին:
