Բրիտանական քեյթերինգային Compass Group ընկերության գործադիր տնօրեն Ռիչարդ Քազինսը եւ նրա հարազատները զոհվել են Ավստրալիայում ինքնաթիռի վթարի հետեւանքով, հաղորդում է «ՌԻԱ Նովոստի»-ն։
Ավելի վաղ հաղորդվել էր, որ մեկ շարժիչով DHC-2 Beaver ինքնաթիռը ընկել է Հոքսբերի գետը։ Վթարի հետեւանքով զոհվել են վեց հոգի`օդաչուն եւ հինգ ուղեւորները:
«Խորը վշտով հաստատում ենք, որ 2017 թ. դեկտեմբերի 31-ին Ավստրալիայում ինքնաթիռի վթարի հետեւանքով մահացել է Ռիչարդ Քազինսը եւ նրա հարազատներից չորս հոգի», - ասված է ընկերության հայտարարության մեջ:
Ընկերության տնօրենների խորհրդի նախագահ Պոլ Ուոլշը ցավակցություն է հայտնել վթարի կապակցությամբ: «Խորապես ցնցված ենք այս սարսափելի լուրից: Compass Group-ում բոլորի մտքերը Ռիչարդի ընտանիքի եւ ընկերների հետ են»,-ասել է Ուոլշը:
Compass Group-ը կորպորատիվ սննդի սպասարկման ոլորտում աշխարհի խոշորագույն ընկերությունն է: Այն գործում է աշխարհի 50 երկրներում՝ կազմակերպելով սննդամթերքի մատակարարումը գրասենյակներին, գործարաններին, դպրոցներին, բուհերին, հիվանդանոցներին, բանտերին, սպորտային օբյեկտներին եւ նավթային հարթակներին: Ամեն տարի ընկերությունը սպասարկում է շուրջ չորս միլիարդ մարդու: