Հայաստանի հետ մենք ունենք ընդարձակ համագործակցություն: Այս մասին այսօր՝ հունվարի 24-ին, լրագրողների հետ ճեպազրույցում ասաց Եվրոպայի խորհրդի գլխավոր քարտուղար Թորբյորն Յագլանդը Հայաստանի նախագահ Սերժ Սարգսյանի հետ հանդիպումից հետո, հաղորդում է NEWS.am-ի թղթակիցը Ստրասբուրգից:
Յագլանդն ընդգծեց, որ Հայաստանում գործընթացները ճիշտ են ընթանում:
«Նախագահ Սարգսյանի հետ մենք շատ հետաքրքիր փոխանակում ունեցանք շատ բազմաթիվ հարցերի շուրջ»,- ասաց նա:
Սերժ Սարգսյանն էլ իր խոսքում հիշեցրեց, որ հունվարի 25-ին լրանում է Եվրոպայի խորհրդին Հայաստանի անդամակցելու 17-րդ տարին:
«2018թ-ի Հայաստանը լրիվ այլ է, քան 2001թ.-ինը: Մեր երկիրը նշանակալի արդյունքների է հասել ժողովրդավարության, մարդու իրավունքների եւ օրենքի գերակայության ամրապնդման գործում: Այստեղ զգալի դերն ունի Եվրոպայի խորհրդի հետ երկարամյա արժեքավոր համագործակցությունը»,- ասաց նա:
Նախագահի խոսքով, հանդիպման ժամանակ ԵԽ գլխավոր քարտուղարի հետ երկուստեք սրձանագրել են, որ հատկապես վերջին տասնամյակի ընթացքում համալիր բարեփոխումներ են կատարվել Հայաստանում հիմնարար ազատությունների երաշխավորման, առավել բաց եւ արդյունավետ կառավարման, դինամիկ քաղաքացիական հասարակության ապահովման ուղղությամբ:
Նշենք, որ Հայաստանի նախագահը Երեւանի ժամանակով ժամը 15.00-ին ԵԽԽՎ-ում հանդես կգա ելույթով, ապա կպատասխանի պատգամավորների հարցերին: Օրվա երկրորդ կեսին Սերժ Սարգսյանը հանդիպում կունենա Մարդու իրավունքների եվրոպական դատարանի (ՄԻԵԴ) նախագահ Գիդո Ռայմոնդիի հետ: Այսքանով կավարտվի Հայաստանի նախագահի աշխատանքային այցը Ֆրանսիա, որը մեկնարկել էր հունվարի 22-ին Փարիզից, որտեղ նա հանդիպում էր ունեցել Ֆրանսիայի նախագահ Էմանուել Մակրոնի հետ: