Թուրքիայի նախագահի անվտանգության եւ արտաքին քաղաքականության հարցերով խորհրդական Մեսութ Հաքքի Քաշինը բացահայտ սպառնացել է լրագրողին ազգային հեռուստաընկերության ուղիղ եթերում՝ հայտարարելով, որ թուրքական հետախուզությունը կգտնի նրան եւ շնաձկների կեր կդարձնի:
Քաշինը CNN Türk հեռուստաընկերության եթերում սպառնալիքների տարափ է տեղացել Ստոկհոլմում ապրող վտարանդի լրագրող Աբդուլլահ Բոզքուրթի վրա եւ ասել, որ Թուրքիայի ազգային հետախուզության կազմակերպությունը կգտնի նրան եւ կպատժի: «Թուրքիայի ազգային հետախուզությունը կգտնի նրան, ասեմ ձեզ: Չգիտեմ՝ արդյոք հետախուզությունը նրան ձկների կամ շնաձկների կեր կդարձնի [որպես սպանության մարտավարություն], բայց դավաճանները միշտ մի օր ստանում են իրենց պատիժը»,- ասել է նա:
65-ամյա պրոֆեսոր Քաշինը Թուրքիայի նախագահին կից անվտանգության եւ արտաքին քաղաքականության խորհրդի անդամ է եւ ռազմավարական հարցերի վերաբերյալ խորհրդատվություն է տալիս նախագահ Ռեջեփ Թայիփ Էրդողանին: Նա նաեւ դասախոսություններ է կարդում Թուրքիայի տարբեր համալսարաններում:
