Պատմության մեջ առաջին անգամ միջազգային խոշոր ներդրողները սկսել են ներդրումներ կատարել հայկական դրամով արժեթղթերում։ Այս մասին այսօր՝ հունիսի 15-ին, ԱԺ նիստում 2022 թվականի պետական բյուջեի կատարողականի հաշվետվության քննարկման ժամանակ ասաց ՀՀ Կենտրոնական բանկի նախագահ Մարտին Գալստյանը՝ պատասխանելով «Հայաստան» խմբակցության քարտուղար Արծվիկ Մինասյանի հարցին, թե ինչպես է ԿԲ-ն գնահատում երկրի անվտանգության հետ կապված ռիսկերը։
«Երեւի պատմության մեջ առաջին անգամ շատ լուրջ միջազգային խաղացողներ սկսեցին գնել հայկական պետական պարտատոմսեր։ Ընդ որում, ոչ թե եվրապարտատոմսերը արտարժույթով, այլ գանձապետական պարտատոմսերը դրամով։ Ամենայն հավանականությամբ, հենց այդ հիմքի վրա կարելի է դատել մեր երկրի անվտանգության հարցերի, ինչպես նաեւ մեր հավասարակշռված մակրոտնտեսական քաղաքականության նկատմամբ նրանց մոտեցումների մասին»,-հավելեց Գալստյանը։
Նրա խոսքով՝ Bloomberg գործակալությունն ավելի վաղ հայտնել է, որ Հայաստանում եւ Վրաստանում ներդրումներ կատարելու մտադրության մասին հայտարարել է Լիխտենշտեյնի սուվերեն հիմնադրամը: Սակայն, Գալստյանի հավաստմամբ, կան նաեւ այլ լուրջ ներդրողներ ԱՄՆ-ից եւ Չինաստանից։
