Սիեռա Լեոնեի նախկին նախագահ Էռնեստ Բայ Կորոման այս շաբաթավերջին կվերադառնա երկիր այն բանից հետո, երբ 2023 թվականի հեղաշրջման փորձի գործով նրա դեմ առաջադրված պետական դավաճանության մեղադրանքները հանվել են։ Այս մասին հայտարարել է երկրի փոխնախագահ Մոհամեդ Ջուլդե Ջալլոհը, հաղորդում է AFP-ն։

«Խաղաղության և ազգային միասնության ոգով նախկին նախագահ դոկտոր Էռնեստ Բայ Կորոման այս շաբաթավերջին կվերադառնա երկիր», — ասել է Ջալլոհը Մակենի քաղաքի բնակիչների հետ հանդիպման ժամանակ, որը նախկին նախագահի քաղաքական հենակետն է։

Կորոման, որը ղեկավարել է Սիեռա Լեոնեն 2007-ից 2018 թվականներին, 2024 թվականին մեկնել էր Նիգերիա այն բանից հետո, երբ նրան մեղադրանք էր առաջադրվել պետական դավաճանության և այլ հանցագործությունների մեջ՝ կապված 2023 թվականի նոյեմբերին տեղի ունեցած զինված խռովության հետ։ Սկզբում նրան թույլատրվել էր երեք ամիս մնալ Նիգերիայում բուժման նպատակով, սակայն արդյունքում նա այնտեղ անցկացրել է ավելի քան երկու տարի։

Հուլիսին Սիեռա Լեոնեի արդարադատության նախարարությունը հայտարարեց Կորոմայի նկատմամբ քրեական հետապնդումը դադարեցնելու մասին՝ չբացատրելով որոշման պատճառները։ Նույն ամսին նա կարճ ժամանակով վերադարձել էր երկիր՝ մասնակցելու Արևմտյան Աֆրիկայի պետությունների տնտեսական համայնքի գագաթնաժողովին՝ գործող նախագահ Ջուլիուս Մաադա Բիոյի հրավերով։

2023 թվականի նոյեմբերին զինված անձինք հարձակվել էին ռազմական զինանոցի, երկու զորանոցի, երկու բանտի և երկու ոստիկանական բաժանմունքի վրա։ Բախումների հետևանքով զոհվել էր 21 մարդ, հարյուրավոր կալանավորներ փախել էին։ Իշխանությունները տեղի ունեցածը որակել էին որպես պետական հեղաշրջման փորձ։ Կորոման հերքել էր իր առնչությունը։

Նրա վերադարձը տեղի է ունենում 2028 թվականին նախատեսված նախագահական ընտրություններից մոտ երկու տարի առաջ։