Ուկրաինական անօդաչու թռչող սարքերը հոկտեմբերի 9-ի գիշերը գրոհել են Կալուգայում գտնվող «Յանդեքս»-ի տվյալների կենտրոնը։ «Տվյալների կենտրոնի մի քանի մոդուլներ ամբողջությամբ շարքից դուրս են եկել։ Դրա պատճառով ծառայությունների մի մասը կարող է աշխատել խափանումներով։ Վնասի ամբողջական ծավալն այժմ գնահատվում է», — հաղորդել են ընկերության մամուլի ծառայությունից։ Այնտեղ նաև ճշտել են, որ գրոհի հետևանքով տուժածներ չկան։ Կալուգայում «Յանդեքս»-ի տվյալների կենտրոնը տեղակայված է «Գրաբցևո» արդյունաբերական գոտում։ Այն ընկերության ամենահզոր կենտրոնն է, զբաղեցնում է 130 հազար քառակուսի մետր տարածք և սպասարկում է ներքին սերվիսները։

Սա արդեն «Յանդեքս»-ի երկրորդ տվյալների կենտրոնն է, որը վերջին մեկ օրվա ընթացքում հայտնվել է Ուկրաինայի զինված ուժերի (ՈւԶՈւ) հարվածի տակ։ Մեկ օր առաջ՝ հոկտեմբերի 8-ին, ուկրաինական դրոնները հարվածել էին ընկերության տվյալների կենտրոնին Ռյազանի մարզի Սասովո քաղաքում։ Օբյեկտի գրոհից հետո այնտեղ հրդեհ էր բռնկվել, դրա աշխատանքը լիովին դադարեցվել էր։ Ավելի ուշ «Յանդեքս»-ում չկարողացան հաստատել սարքավորումների վերականգնման հնարավորությունը։ Ընդ որում, տվյալների կենտրոնում տեղակայված էր «Յանդեքս»-ի երեք սուպերհամակարգիչներից երկուսը, որոնք այն օգտագործում է իր YandexGPT արհեստական բանականության մոդելի ուսուցման համար։