նախընտրելի դարձնելՍկեսուրի` Հայկանուշ Միքայելյանի եւ ամուսնու` Դավիթ Զիրոյանի կողմից դաժան ծեծի ենթարկված Մարիամ Գեւորգյանի գործով դատավարությունը Արարատի եւ Վայոց-ձորի ընդհանուր իրավասության դատարանում տեղի կունենա դռնփակ: Այս մասին, այսօր` մայիսի 31-ին, ասուլիսում նշեց «Ընդդեմ կանանց նկատմամբ բռնություն» կոալիցիայի անդամ Աննա Նիկողոսյանը, դատարանի այդ որոշումը համարելով չհիմնավորված:
Գործով տուժող Մարիամ Գեւորգյանն էլ նշեց, որ ինքը ցանկանում է, որ դատավարությունը դռնբաց անցնի, որպեսզի իմանան, թե այս աշխարհում ինչպիսի մարդիկ կան եւ, որ լռությամբ ոչնչի չենք հասնի: Նրա պաշտպան Նոնա Գալստյանն ավելացրեց, որ ինքը դատավորին ինքնաբացարկի միջնորդություն է ներկայացրել, քանի որ կարծում է, որ նա կողմնակալ է:
Նա տեղեկացրեց, որ այսօր, ժամը 14.00-ին դատախազության դիմաց բողոքի ակցիա են անցկացնելու, պահանջելով, որ դատական նիստը շարունակվի դռնբաց: Վերջիններս նկատեցին, որ Մարիամ Գեւորգյանի նախկին ամուսին Դավիթ Զիրոյանը դատական նիստի ժամանակ սպառնալիքներ է հնչեցրել, թե գործով վկաների, թե հ/կ-ների ներկայացուցիչների հասցեին:
«Եթե նա հաջորդ դատական նիստին նույն պահվածքը շարունակի, ապա մենք ոստիկանությունում հանցագործության մասին հաղորդում կտանք»,-ասացին նրանք:
