նախընտրելի դարձնել
Նախախորհրդարանի նախաձեռնողները հանդես են եկել հայտարարությամբ, որտեղ նախանշում է իր անելիքները:
Հայտարարությունում ասվում է.
«Շուրջ մեկ ամիս առաջ` 2012 թ. նոյեմբերի 20-ին, Հայաստանի երեք տասնյակ քաղաքացիներ նախաձեռնել են ազգային նպատակներ ու խնդիրներ առաջադրելու եւ իրականացնելու ունակ կառավարման համակարգ ունեցող պետության ձեւավորման գործընթացի մեկնարկը, եւ որպես այդ գործընթացի նախաձեռնող խումբ` իրենց հռչակեցին Նախախորհրդարան:
Սա պայմանավորված էր այն արձանագրումով, որ Հայաստանում առկա է պետականության գոյությանը սպառնացող բարոյա-հոգեբանական, սոցիալ-տնտեսական, ժողովրդագրական եւ կառավարման` օրեցօր խորացող համակար-գային ճգնաժամ. որն իրական վտանգ է հանդիսանում հայրենիքում բնակվող հայության ֆիզիկական գոյության համար:
Նախախորհրդարանը համակարգային ճգնաժամի հաղթահարման առաջնային պայման է համարում արդյունավետ այլընտրանքային կառավարման ապահովումը, որին հասնելու համար հետամուտ է լինելու լուծել հետեւյալ խնդիրները.
- մշակել ազգային նպատակներ ու խնդիրներ առաջադրելու եւ իրականացնելու ունակ կառավարման համակարգ ունեցող պետության ռազմավարական հայեցակարգը,
- նախադրյալներ ստեղծել Հայաստանում եւ արտերկրում բնակվող համապատասխան կադրային ռեսուրսի ներգրավման համար,
- ապահովել նոր որակի պետության ձեւավորման մեկնարկի համար անհրաժեշտ ներկայացուցչական մարմնի` Հիմնադիր խորհրդարանի կազմավորումը:
Այս խնդիրների լուծմանը ձեռնամուխ լինելով, Նախախորհրդարանն արդեն անցկացրել է մի քանի լիագումար նիստ, որոնց ընթացքում մշակել է իր գործունեության կանոնակարգային ու մեթոդաբանական փաստաթղթերը, կազմավորել է ռազմավարական հայեցակարգի մշակման ոլորտային աշխատանքային խմբեր: Այդ խմբերում ներգրավվում են Հայաստանում եւ արտերկրում բնակվող փորձագետներ եւ խորհրդականներ: Խմբերի աշխատանքը զուգահեռաբար կատարվում է երկու` ռազմավարական հայեցակարգի նախագծի տեքստի մշակման եւ հանրային լսումների կազմակերպման ուղղությամբ: Լսումներին որպես բանախոսներ են հրավիրվում տվյալ ոլորտում հայտնի մասնագետներ եւ վաստակ ունեցող անհատներ: Լսումները լինելու են բաց, եւ հեռարձակվելու են ինտերնետային կապով:
Արդեն կազմակերպվել է առաջին հանրային լսումը, որը նվիրված է եղել «Հայրենադարձությունը եւ ազգային անվտանգության մարտահրավերները» թեմային: Կարեւորվում են նաեւ Նախախորհրդարանի արտագնա նիստերը, որոնցից առաջինը կայացել է Գյումրիում: Սկսել են նաեւ հանդիպումներ համակիրների հետ արտերկրում, մասնավորապես կազմակերպվել են Նախախորհրդարանի եւ նրա քարտուղարության անդամների հանդիպումներ Եվրոպայի մի շարք երկրներում եւ ԱՄՆ-ում:
Նախախորհրդարանի ծնունդը համընկավ Հայաստանում դասական կուսակցական քաղաքական դաշտի փլուզման հետ եւ սա պատահական չէր: Ներկայացուցչական ժողովրդավարության սնանկացումը պետք է ծներ անմիջական ժողովրդավարական, քաղաքացիական դաշտի անհրաժեշտ վերակազմակերպում՝ նոր ներկայացուցչական մարմինների անհրաժեշտ սաղմնավորմամբ:
Մենք, փաստորեն, ականատեսն ենք մեր երկրի քաղաքական պատմության քսանամյա շրջանի ավարտին եւ նորի ծնունդին: Նախախորհրդարանը վստահ է, որ մեր ժողովուրդը հաղթահարելու է քայքայվող քաղաքական դաշտին հատուկ հեղծուկ գորշությունը, դրանից բխող հասարակական անտարբերությունն ու հուսահատությունը: Իրենց մարդկային եւ ազգային արժանապատվությանը տեր կանգնելու պատրաստ քաղաքացիները հանրությանը համախմբվելու են արժանի նպատակի` նոր որակի պետության ձեւավորման առանցքի շուրջ եւ ապահովելու են քաղաքական արատավոր շրջանից երկրի դուրսբերումը:
Քրեա-օլիգարխիկ վարչախմբի ու նրան լեգիտիմացնող ընդդիմության վերնախավի գործակցությամբ ձեւավորված ”քաղաքական” գործընթացներում՝ “նախագահական ընտրություններ” կոչվող բեմականացման մեջ ժողովրդին վերապահված պասիվ դիտորդի վիճակը ժամանակավոր է:
Քաղաքական թմբիրից արթնացող քաղաքացիների համար ակնհայտ է, որ ներկայիս «ընտրախավը» հանդիսանում է հանցագործ ու անձեռնհաս կեղեքիչների խումբ, որը պետությունը վերածում է գաղութի. եւ որը, ազգային շահերին համապատասխան կառավարելու փոխարեն, հարմարվելով միջազգային կոնյուկտուրային, իր նպատակն է դարձրել սեփական կլանային շահերի իրացումը ժողովրդի, երկրի ու պետության հաշվին:
Քաղաքացիները այլընտրանքային ընտրությունների միջոցով ծնելու են մեր պատմությանը արժանի իսկական ընտրախավ` Հիմնադիր խորհրդարան, նրան տալով իրենց դեմքը լինելու, հանցավոր վարչախմբին հեռացնելու եւ քաղաքական ճահիճը մաքրելու լիազորություններ:
Շնորհավորելով մեր ժողովրդի գալիք Ամանորը եւ Սուրբ Ծնունդը ` Նախախորհրդարանը հավաստիացնում է, որ կուտակելով մտավոր ու մասնակցային անհրաժեշտ ներուժ, այն առաջիկա տարում կառուցիկ եւ անկոտրում ընթանալու է դեպի նշված նպատակի իրականացումը»:
Նշենք, որ Նախախորհրդարանի նախաձեռնողների շարքում են Տիգրան Խզմալյանը, Գարեգին Չուքասզյանը, Հրանուշ Խառատյանը եւ այլ հայտնի մարդիկ:
