նախընտրելի դարձնել
Լեհաստանը Ռուսաստանին է հանձնել Մոսկվայի մարզի դատախազի նախկին առաջին տեղակալ, խաղային սկանդալի գլխավոր մասնակից Ալեքսանդր Իգնատենկոն:
Իգնատենկոյին փետրվարի 7-ին հասցրել են Վարշավայի օդանավակայան, նստեցրել Մոսկվա մեկնող լեհական LOT ավիաընկերության սովորական չվերթի ինքնաթիռ: Ցերեկվա ժամը երկուսին ինքնաթիռը վայրէջք է կատարել Շերեմետեւոյում: Նրան տեղափոխել են մայրաքաղաքային բանտի հատուկ ստորաբաժանում:
Հիշեցնենք, ՌՔԿ-ն Իգնատենկոյին հեռակա կարգով մեղադրանք էր առաջադրել ՔՕ 290 («Կաշառքի ստացում») եւ 159 հոդվածների («Խաբեբայություն») հատկանիշներով: Առաջին դեպքում Իգնատենկոն ընդհատակյա խաղատների հովանավորչության համար շուրջ 50 միլիոն ռուբլի կաշառք էր վերցրել, իսկ մյուս դեպքում խաղային բիզնեսի կազմակերպիչ Իվան Նազարովին 2 միլիոն ռուբլով «Սիլանս» «դատախազական» կոոպերատիվից հողատարածք էր վաճառել:
«Իզվեստիա» թերթը հիշեցնում է, որ 2011թ. սպասվում էր, որ հենց Իգնատենկոն, կզբաղեցնի մերձմոսկովյան գլխավոր դատախազի աթոռը: Իգնատենկոյի եկամուտների պաշտոնական հայտարարագիրը չէր զարմացնում, սակայն դատախազն ուներ նաեւ այլ կյանք, որում կային թանկ նվերներ՝ 1 միլիոն ռուբլի արժեցող նրա սիրելի Ulysse Nardin ժամացույցը, պլատինե Vertu հեռախոսը, գործարարների վճարած ուղեգրեր դեպի Արաբական էմիրություններ, Ստամբուլ եւ Անթալիա: Իր 50-ամյակն Իգնատենկոն նշել էր նավթային մագնատի նման:
Ըստ քննության՝ իր կարողությունն Իգնատենկոն վաստակել էր Մոսկվայի մարզում ընդհատակյա խաղատների ցանցի հովանավորչությամբ, որոնք ղեկավարում էր Իվան Նազարովը:
Հետաքննության շրջանակում ձերբակալվել էին Նոգինսկի դատախազ Վլադիմիր Գլեբովը, Պուշկինոյի դատախազ Ռոման Նեշչիմենկոն եւ Սերպուխով շրջանի դատախազ Օլեգ Բազիլյանը: Ներկայումս բացի Իգնատենկոյից «խաղային» գործով կալանավորված ոչ մի մեղադրյալ չի մնացել:
