Հայաստանում քաղաքական տեսանկյունից աշունն ակտիվ կլինի:  Այս մասին այսօր՝ օգոստոսի 26-ի մամուլի ասուլիսում  հայտնել է ԱԺ  ՀՀԿ-ական  պատգամավոր Մկրտիչ Մինասյանը՝ հավելելով, որ հասարակական կարծիքի նկատմամբ իշխանության եւ ՀՀԿ-ի  վերաբերմունքը համարժեք կլինեն:

Ըստ նրա` վերջերս աշխուժացել է հասարակական կարծիքը, եւ բնականաբար,  իշխանությունները նույնպես պարտավոր են համարժեք վերաբերմունք դրսեւորել հասարակական ակտիվ ընկալումների նկատմամբ, անհրաժեշտության դեպքում ուղղեն սխալները եւ այլն:

Ինչ վերաբերում է Կոմիտասի պողոտայում տեղի ունեցած իրադարձություններին, նա ընդգծել է, որ եթե դժգոհություն կա, ապա պետք է հասկանալ այդ դժգոհության  պատճառները: «Եթե կառուցվող շինությունը չի համապատասխանում սանիտարական եւ քաղաքաշինական  պայմաններին, ապա անհրաժեշտ է համապատասխան վերաբերմունք դրսեւորել , իսկ եթե խոսքը միայն մեր քաղաքացիների զգայական ընկալման մասին է, ապա այդ դեպքում պետք է մարդկանց ապացուցել, որ այստեղ ոչ մեկի իրավունքը չի խախտվում», - նշել է պատգամավորը՝ հավելելով, որ ոստիկանները պետք է հարգանքով վերաբերվեն քաղաքացուն ,եւ դա պետք է փոխադարձ լինի:

Ի պատասխան երկրում ընդդիմության պասիվության մասին հարցին, Մինասյանը նշել է, որ երկրի ներսում ընդդիմադիր դաշտ գոյություն ունի: «Հնարավոր է` քաղաքական ուժերը միասնական չեն գործում, սակայն դա չի նշանակում, որ նրանք գոյություն չունեն», - եզրակացրել է պատգամավորը:

Հիշեցնենք, որ Կոմիտասի պողոտա 5 հասցեում կառուցվում է 10-հարկանի շենք: Շրջակայքի բնակիչները դեմ են դրան:  Նրանք պնդում են, որ բազմահարկ շենքի կառուցման դեպքում այն ամբողջովին կփակի այլ շենքերի վրա ընկնող լույսը, կխանգարի շենքերին մոտենալուն:

Շենքի շինարարությունն սկսվել էր մի քանի տարի առաջ: Սակայն բնակիչների բողոքների պատճառով շինարարությունը դադարեցվել էր: Վերջին երկու շաբաթում  շինարարությունը վերսկսվել էր: Բնակիչները մտադիր են շարունակել բողոքը: