նախընտրելի դարձնել
Բենգազիի գրոհայիններն ազատ են արձակել Etel նավի ուկրաինացի 19 նավաստիներին, որոնք հուլիսի 17-ին գերության մեջ էին հայտնվել: Սակայն ուկրաինական անձնակազմի անդամները հրաժարվում են հայրենիք վերադառնալ՝ գործատուից աշխատավարձ պահանջելով:
«Վաղ առավոտյան նավում ահազանգ է հնչել, ամբողջ անձնակազմին հավաքել են կամրջակի վրա եւ հայտնել, որ ազատ ենք: Արաբները թաքցրել էին զենքերը, սկսել հավաքել իրենց քնապարկերը, ամեն ինչ բեռնել միկրոավտոբուսների մեջ եւ հեռացել: Մեզ վրա ոչ ոք ուշադրություն չէր դարձնում», - «Կոմսոմոլսկայա պրավդա»-ի ուկրաինական խմբագրությանը հայտնել է նավաստի Ալեքսանդրը:
Ըստ նրա՝ ԱԳՆ-ն առաջարկել է նավաստիներին հայրենիք ուղարկել առաջիկա չվերթով, սակայն նավապետն ասել է, որ Etel-ն արդեն նոր անձնակազմ է հավաքագրել, իսկ իրենց ոչ ոք չի պատրաստվում փող վճարել:
Հաղորդվել էր ,որ 2013թ. հուլիսի 17-ին Սենտ Կիթսի եւ Նեւիսի դրոշի տակ լողացող Etel նավը, որի անձնակազմը բաղկացած էր 19 ուկրաինացիներից, Լիբիայի Բենգազի նավահանգստում գերեվարվել էր զինված անհայտ անձանց կողմից: Նավը գրավողները հայտնել էին, որ «իրենք պաշտպանում են լիբիացի 25 գործարարների շահեր, որոնց թալանել է Etel-ի սեփականատերը»: Նավը Հորդանանից Բենգազի պետք է տեղափոխեր 9,5 միլիոն դոլար արժողությամբ 650 մեքենա, սակայն, ըստ գործարարների, մեքենաները բեռնաթափվել էին ուկրաինական նավահանգստում եւ մինչեւ վերջնակետ չէին հասցվել: Օգոստոսի 28-ին Լիբիային է մոտեցել «Աի Ամազոն» նավը՝ Լիբիայի համար մեքենաների բեռով, ներկայումս նավահանգստում բեռնաթափում են այն:
