նախընտրելի դարձնել
Հայաստանի վարչապետ Տիգրան Սարգսյանը համամիտ է, որ անբավարար տեղեկություններ կան այն հիմնադրամների մասին, որոնց փոխանցվելու են կենսաթոշակային պարտադիր կուտակային համակարգով նախատեսված հատկացումները: Հիշեցնենք, կենսաթոշակային բարեփոխումը ուժի մեջ է մտնելու 2014թ. հունվարի 1-ից:
Մամուլի ասուլիսի ընթացքում պատասխանելով այն հարցին, թե ինչպես է գործելու համակարգը, վարչապետը հայտնել է, որ հիմնադրամների խաղի կանոնները հաստատվել են ՀՀ-ի կողմից: «Հարցերի պատասխանները տալիս է մեր օրենսդրությունը», - հայտարարել է վարչապետը: Նա վստահեցրել է, որ այդ կանոնները համապատասխանում են համաշխարհային լավագույն փորձին, եւ ուղղված են ներդրումների պահպանումն ապահովելուն: Այդ ներդրումները կառավարելու են այդ բնագավառում առաջատար եվրոպական երկու հիմնադրամներ, որոնք ստացել են Կենտրոնական բանկի հավատարմագրումը:
«Հարցի երկրորդ մասի հետ ես համաձայն եմ: Այդ պատճառով էլ կխնդրեմ ԿԲ-ի գործընկերներին ավելի մանրամասն տեղեկություններ հաղորդել հիմնադրամների մասին: Սակայն ամենակարեւորն այն է, որ դրանք հեղինակավոր ընկերություններ են, ներդրումների կորուստի հավանականությունը շատ քիչ է, հավասար է զրոյի», - նշել է Տիգրան Սարգսյանը:
Ըստ նրա` ներդրումներ կատարելու գործընթացը նաեւ սահմանվել է օրենքով: Օպերատոր հիմնադրամներին արգելված է ռիսկային գործողություններ իրականացնելը, եւ գործընթացին հետեւելու է ԿԲ-ն: Վարչապետը նշել է, որ դա նաեւ նվազեցնում է ռիսկերը` չնայած ամեն դեպքում պետությունը դրանք կհատուցի:
