ԿԺԴՀ-ում ժամացույցի սլաքը կես ժամով հետ են տվել  եւ անցել են իրենց սեփական ժամային գոտուն, փոխանցում է հյուսիսկորեական ԿԿՀ գործակալությունը։

«ԿԺԴՀ-ի Գերագույն ժողովրդական ժողովի Նախագահությունը որոշում է ընդունել հանրապետության ստանդարտ ժամը հաստատել արեւելյան երկայնության 127 աստիճան 30 րոպե-ին համապատասխան եւ այն կիրառել օգոստոսի 15-ից», — ասվում է հյուսիսկորեական գործակալության հաղորդագրության մեջ։

Անցումը նոր ժամանակին հաստատություններում նշանավորվել է զանգերի ղողանջով, իսկ ձեռնարկություններում եւ փոխադրամիջոցներում՝  ազդանշաններով եւ սուլոցներով, փոխանցում է Gazeta-ն։

«Կորեայի ժողովրդական բանակի զինվորականները, որոնք պաշտպանում են երկիրը, գիտնականները, որոնք հրթիռներ են կառուցում տիեզերքի նոր ոլորտներ յուրացնելու համար, և մնացած բոլոր քաղաքացիները իրենց ժամացույցները լարում են Փհենյանի ժամանակով՝ այդ համազգային իրադարձության առաջացրած հուզմունքի եւ հիացմունքի մթնոլորտում», — ասվում է ԿԿՀ գործակալության հաղորդագրության մեջ։