ՄԱԿ-ում Ֆրանսիայի մշտական ներկայացուցիչ Ֆրանսուա Դելատրը հանդես է եկել պնդմամբ, որ ապրիլի 7-ին Սիրիայում Ռուսաստանի համաձայնությամբ կամ աջակցությամբ քիմիական հարձակում է կատարվել, հայտնում է ՏԱՍՍ-ը:

«Հիմա Սիրիայի ամբողջ ռազմական համակարգը չէր կարող որեւէ քայլ կատարել՝ առանց տեղեկացնելու իր ռուսաստանյան դաշնակիցներին: Անկասկած, այս հարձակումը կատարվել է կա՛մ Ռուսաստանի լռելյայն համաձայնությամբ, կա՛մ նրա ռազմական ներկայության օգտագործմամբ,- պնդել է Դելատրը ՄԱԿ ԱԽ նիստում: - Ռուսաստանյան զինվորականները Արեւելյան Գուտայում են ինչպես ցամաքում, այնպես էլ օդում: Ապրիլի 7-ին երկրորդ հարձակման ժամանակ ռուսական օդանավերը նկատվել են Դամասկոսի շրջանի օդային տարածքում»:

Ֆրանսիան Ռուսաստանից պահանջել է ապահովել Սիրիայում կրակի դադարեցումը, ինչպես նաեւ չխոչընդոտել քիմիական զենքի կիրառման միջադեպերի հետաքննության միջազգային նոր մեխանիզմների ստեղծմանը եւ աշխատանքին:

Դելատրը հանդես է եկել Ռուսաստանին հղած ուղերձով եւ բարձրաձայնել ՌԴ-ին ներկայացված Ֆրանսիայի 2 պահանջը: «Առաջին՝ ռազմական գործողությունների դադարեցում եւ հրադադարի ռեժիմի անհապաղ վերականգնում ըստ ընթացիկ տարվա փետրվարի 25-ն ընդունված 2401 բանաձեւի, որը դամասկոսյան ռեժիմը մինչեւ այս պահը դեռ չի կատարել»,- հայտարարել է Ֆրանսուա Դելատրը:

«Երկրորդ պահանջը՝ հետաքննության միջազգային նոր մեխանիզմի ստեղծում, որը կկարողանար ուսումնասիրել Դումայում հարձակման բոլոր պարամետրերը եւ բնութագրերը, հրապարակել մեղավորներին եւ նրանց պատասխանատվության ենթարկել: Ռուսաստանի կողմից 2 իրար հաջորդող վետոյի հետեւանքով Հետաքննության համատեղ մեխանիզմի աշխատանքի դադարեցումը մեզ բերել է նրան, որ մենք կորցրել ենք զսպման հիմնական միջոցը: Մենք աջակցում ենք բանաձեւի նախագիծը, որը պատրաստել է Միացյալ նահանգները»,- եզրափակել է ֆրանսիացի դիվանագետը: