Ոստիկանության Գյումրիի բաժնի ծառայողները,  թմրամիջոց պահելու կասկածանքով, մարտի 1-ի երեկոյան քաղաքի Երեւանյան խճուղուց, «Ֆոլքսվագեն-Գոլֆ» մակնիշի ավտոմեքենայով, բերման են ենթարկել  28-ամյա Ռոմիկ Ո.-ին եւ ուղեւոր, 32-ամյա  Արմեն Գ.-ին:

Ոստիկանության մամուլի ծառայությունից NEWS.am-ին հայտնում են, որ զննությամբ ավտոմեքենայի բեռնախցիկից հայտնաբերվել է 3 ներարկիչ` դեղնավուն լուծույթով:

Ռոմիկ Ո.-ն եւ Արմեն Գ.-ն հայտնել են, որ հայտնաբերվածը «Կաֆետին» դեղորայքից պատրաստված թմրամիջոց է, որը  ձեռք են բերել Գյումրի քաղաքի Արցախ թաղամասում, «Կուզիկ» մականունով ոմն Տիգրանից:

Ձեռնարկվում են միջոցառումներ Տիգրանի անձը պարզելու եւ նրան հայտնաբերելու ուղղությամբ:

Նշանակվել է փորձաքննություն: Կատարվում է հետաքննություն:

Նույն օրը, ժամը 21.50-ին, ոստիկանության Գյումրիի բաժնի ծառայողները Գյումրի քաղաքի Աթարբեկյան փողոցից բերման են ենթարկել նախկինում դատապարտվածներ, 47-ամյա Տիգրան Ղ.-ին եւ 36-ամյա Արմեն Գ.-ին:

Զննությամբ Տիգրան Ղ.-ի տնից հայտնաբերվել է ներարկիչ` 1 մլ կարմիր հեղուկով, տարբեր տարողության երկու տարա` դեղնավուն եւ սպիտակավուն հեղուկներով:

Տիգրան Ղ.-ն եւ Արմեն Գ.-ն հայտնել են, որ հայտնաբերվածը թմրամիջոց է, որը  պատրաստել են իրենց օգտագործման համար:

Նշանակվել է փորձաքննություն: Կատարվում է հետաքննություն: