ԱՄՆ եւ Ֆրանսիայի նախագահներ Դոնալդ Թրամփն ու Էմանուել Մակրոնը հեռախոսազրույցի ժամանակ քննարկել են ՄԱԿ-ի ԱԽ մշտական անդամների (Ռուսաստան, Մեծ Բրիտանիա, Չինաստան, ԱՄՆ եւ Ֆրանսիա) առաջնորդների համաժողովը գումարելու հարցերն ու Առողջապահության համաշխարհային կազմակերպությունում (ԱՀԿ) բարեփոխումների անհրաժեշտությունը, հաղորդում է ՏԱՍՍ-ը՝ հղում անելով Սպիտակ տան մամուլի քարտուղարի տեղակալ Ջադ Դիրի հայտարարությանը։

«Նախագահ Թրամփն ու նախագահ Մակրոնը քննարկել են պանդեմիայի դեմ պայքարում դրական զարգացումն ու համաշխարհային տնտեսությունների բացման հեռանկարները (սանիտարական սահմանափակումները չեղարկելու համար)։ Առաջնորդները հույս են հայտնել «հնգյակի» առաջիկա հանդիպման մասին եւ դիտարկել պանդեմիայի հարցում ՄԱԿ-ի արձագանքը,-նշված է տեքստում։-Նախագահները համաձայնվել են ԱՀԿ-ում բարեփոխումներ կատարելու անհրաժեշտության հետ։ Դոնալդ Թրամփն ու Էմանուել Մակրոնը նաեւ անդրադարձել են տարածաշրջանային ու երկկողմանի առանցքային հարցերին»։