նախընտրելի դարձնելԱրդարադատության նախարարի առաջին տեղակալ Գրիգոր Մուրադյանը չի հերքել տեղեկությունն այն մասին, որ բարձրաստիճան պաշտոնյաները Նոտարիատում գործարքներ կնքելիս չեն վճարում պետական տուրքը:
Ավելի վաղ NEWS.am-ը հայտնել էր, որ մայիսի 25-ին ԱՆ Նոտարիատի բաժնի նախկին պետ Մարիամ Գաբոյանն ասուլիսում վրդովված ասել էր, թե բարձրաստիճան պաշտոնյաները Նոտարիատում գործարքներ անելիս չեն վճարում պետական տուրքը: Այս առնչությամբ մայիսի 26-ին կառավարության նիստից հետո Արդարադատության նախարարի առաջին տեղակալ Գրիգոր Մուրադյանը պարզաբանումներ է ներկայացրել լրագրողներին:
«Նոտարիատի բաժինը, որը կազմակերպվեց պետք է զբաղվեր վերահսկողությամբ, որպեսզի պետական տուրքերը վճարեին բոլորը, հետեւաբար արդեն իսկ ինքն իր հարցի պատասխանը տվեց դրանով: Մի գուցե վերակազմակերպման հիմքերից մեկը հենց դա էր, որ պատշաճ վերահսկողություն չէր իրականացվում, այնինչ այդ բաժնի գերխնդիրը հենց դա էր»,-ասել է Մուրադյանը:
Հարցին, թե մինչ Գաբոյանի հայտարարությունը իրենք տեղյա՞կ էին, որ տուրքեր չէր վճարվում, թե՞ այդ մասին տեղեկացել են պաշտոնանկ կոլեգայի ահազանգից հետո, նա պատասխանեց. «Այդ ահազանգը ինքը պիտի առաջինը ստանար եւ ժամանակին վերլուծեր: Մնացյալ մասով հետագա ահազանգերը, որոնք կլինեն օրինականության վերահսկողության տեսչությանը, բնականաբար, բոլորը ուսումնասիրվելու են եւ արժանանալու են արձագանքի»,-վստահեցրել է փոխնախարարը:
Հարցին, թե այս սկանդալային հայտարարությունից հետո կուսումնասիրե՞ն այն գործարքները, որոնց դեպքում չի վճարվել պետական տուրք, Մուրադյանը խուսափել է մեկնաբանել, սակայն վերստին պնդել է, որ այն ժամանակին Գաբոյանի ղեկավարած բաժնի խնդիրն է եղել` ուսումնասիրել այդ փաստերը եւ ընթացք տալ սահմանված կարգով:
Դիտարկմանը, թե եթե բացահայտեն, որ Մարիամ Գաբոյանը տեղյակ է եղել ու չի զբաղվել դրանով, կպատժվի՞, նա արձագանքել է, «Եթե մենք ունենանք հավաստի տվյաներ, որ եղել են նման անօրինանություններ, մենք անհապաղ ընթացք կտանք»,-հավաստիացրել է Գրիգոր Մուրադյանը:
