նախընտրելի դարձնել
Ֆրանսիայի նախագահ Էմանուել Մակրոնը կոչ է արել կրկնապատկել զգոնությունը` COVID-19-ի հետ կապված իրավիճակի պատճառով` հաշվի առնելով նոր վիրուսի մուտացիայի ի հայտ գալը Մեծ Բրիտանիայում, հայտնում է «ՌԻԱ Նովոստի»-ն:
«Մենք պետք է շատ զգոն լինենք»,- ասել է Մակրոնը` ելույթ ունենալով նախարարների առցանց խորհրդին: Նրա խոսքերը մեջբերում է BFMTV հեռուստաալիքը: Մակրոնն անդրադարձել է «վիրուսի խնդրահարույց մուտացիային»` նկատի ունենալով Մեծ Բրիտանիայում հայտնաբերված նոր շտամը:
«Այս ամենը ցույց է տալիս վիրուսի բարդությունը, դրա ագրեսիվությունը եւ կհամարձակվեմ ասել` հնարամտությունն ու հնազանդությունը, որոնք մենք պետք է ունենանք»,- ասել է Ֆրանսիայի նախագահը:
Ավելի վաղ Մեծ Բրիտանիայում SARS-CoV-2 կորոնավիրուսի նոր մուտացիա էր հայտնաբերվել: Շաբաթ օրը Մեծ Բրիտանիայի Նոր եւ առաջացող շնչառական վիրուսային սպառնալիքների խորհրդատվական խորհուրդը հաստատել էր, որ երկրում հայտնաբերված կորոնավիրուսի տարբերակն ավելի արագ տեմպերով է տարածվում եւ էլ ավելի մեծ զգոնություն է պահանջում բնակչությունից: Չնայած վիրուսի նոր տարբերակը, ըստ նախնական գնահատականների, կարող է 70 տոկոսով ավելի վարակիչ լինել, քան սովորականը, դեռ ոչինչ չի վկայում, որ այն ավելի վտանգավոր է մահացության կամ հոսպիտալացման տեսանկյունից:
