նախընտրելի դարձնել
2020 թվականի սեպտեմբերի վերջից նավթի գների կայուն աճ է նկատվում, որը հասել է 40 դոլարի մեկ բարելի դիմաց, տարեվերջին այն գերազանցել էր 50 դոլարը, եւ այս աճը շարունակվում է: Այս մասին NEWS.am-ի հետ զրույցում ասաց Քաղաքական գիտությունների դոկտոր, էներգետիկ անվտանգության փորձագետ Վահե Դավթյանը:
Դա, նրա խոսքով, կապված է դրական միտումների հետ նավթի համաշխարհային շուկայում: Ներկայումս նավթի գինը տատանվում է 55-56 դոլարի սահմաններում բարելի դիմաց, ինչը հարմարավետ գոտի է նավթ արտադրող եւ արտահանող երկրների, հատկապես` Ռուսաստանի եւ Սաուդյան Արաբիայի համար, որոնք արդյունահանվող նավթի բավականին ցածր գին են ապահովում:
Ընդհանուր առմամբ, ՕՊԵԿ+ համաձայնագրի մասնակիցների մեծ մասի համար, որը վերակնքվեց 2020 թվականի ապրիլին, ներկայիս գինն ավելի քան հարմար է թվում: Կանխատեսումը, որ ՕՊԵԿ+ կրկնակի գործարքը համաշխարհային շուկայի վրա դրական արդյունքի չի հանգեցնի կորոնավիրուսի միտման երկարատեւ բացասական ազդեցության պատճառով, այնքան էլ չարդարացվեց:
«Հաշվի առնելով այս կարտելային պայմանագրով հաստատված սահմանված քվոտաները` 2021-ի համար նավթի գինը տարածաշրջանում կարելի է 48-57 դոլար կանխատեսել բարելի դիմաց: Սա այն հարմարավետ միջակայքն է, որը տարվա ընթացքում էապես չի փոխվի: Ընդ որում, նույնիսկ կորոնավիրուսի կանխատեսվող նոր ալիքը չի հանգեցնի նրան, ինչն «ապրիլյան ցնցում» էր կոչվում: Նավթագազային ոլորտը հարմարվել է նոր իրողություններին: Նույնիսկ փակ սահմանների պայմաններում ՕՊԵԿ+-ի կողմից օգտագործվող գործիքները թույլ տվեցին կայունացնել գինը: Դա բավարար է միջնաժամկետ հատվածում նշված գնային միջակայքը պահպանելու համար»,- ընդգծեց Դավթյանը: Փորձագետը նշեց, որ նավթ արդյունահանող եւ արտահանող երկրները, այդ թվում` Ադրբեջանը, իրենց բյուջեների հիմքում դրել են 50 դոլար գինը բարելի դիմաց, ուստի ներկայիս գինն ավելի քան հարմարավետ է:
Զբոսաշրջության սեզոնի պիկին սահմանների հնարավոր ապաշրջափակումը լրացուցիչ դրական ազդեցություն կունենա այս երկրների վրա:
