նախընտրելի դարձնել
Պակիստանի բանակի գլխավոր հրամանատարը Հնդկաստանին եւ Պակիստանին կոչ է արել «թաղել անցյալը» եւ համագործակցել, հաղորդում է AP-ը:
Գեներալ Քամար Ջավեդ Բաջվան շեշտել է, որ Հնդկաստանը պետք է ստեղծի «նպաստավոր միջավայր», իսկ Վաշինգտոնը պետք է իր դերը խաղա տարածաշրջանային հակամարտությունների դադարեցման գործում:
«Մենք զգում ենք, որ ժամանակն է թաղել անցյալը եւ առաջ շարժվել»,-ասել է Բաջվան Իսլամաբադում կայացած համաժողովի ժամանակ: «Սակայն մեր հարեւանը (Հնդկաստանը) ստիպված կլինի բարենպաստ պայմաններ ստեղծել, հատկապես Հնդկաստանի կողմից օկուպացված Քաշմիրում»,-ասել է նա:
Հնդկաստանը եւ Պակիստանը վերահսկում են Քաշմիրի հյուսիսային շրջանի որոշ տարածքներ, բայց երկու երկրներն էլ լիովին հավակնում են Հիմալայան տարածաշրջանին, ինչը պատճառ է դարձել նրանց միջեւ բախումներին:
Հարաբերությունները վատթարացել են 2019-ին այն բանից հետո, երբ Դելին Քաշմիրի իր մասին զրկել է այն հատուկ կարգավիճակից, որը նա վաղուց ուներ Հնդկաստանի սահմանադրության համաձայն:
Բաջվան ասել է, որ Հարավային եւ Կենտրոնական Ասիայի տնտեսական ներուժը «հավերժ պատանդ է» Հնդկաստանի եւ Պակիստանի միջեւ վեճերի պատճառով: Նրա խոսքով՝ Պակիստանը հույս ունի, որ ԱՄՆ նախագահ Ջո Բայդենի վարչակազմը կկարողանա նպաստել տարածաշրջանում խաղաղություն հաստատմանը:
