Նախընտրելի
ԱՄՆ-ն ուզում է մինչեւ 2026 թվականը վերակազմավորել ԱՄՆ ծովային հետեւակային ստորաբաժանումները ճապոնական Օկինավա կղզում՝ զինելով դրանք հրթիռներով եւ ավելի թեթեւ տեխնիկայով՝ չինացի զինվորականներին զսպելու համար: Ծրագիրը Տոկիոյի հետ կքննարկվի Վաշինգտոնում, հայտնում է Yomiuri թերթը։
ԱՄՆ-ն արդեն տեղեկացրել է Ճապոնիային վերակազմավորման մասին, որի մասին նրանք կհայտարարեն Վաշինգտոնում Ճապոնիայի պաշտպանության եւ արտաքին գործերի նախարարների եւ նրանց ամերիկացի գործընկերների միջեւ «երկու գումարած երկու» ձեւաչափով հանդիպումից հետո, գրում է թերթը։
Նոր ստորաբաժանումների ստեղծումը, որոնք կոչվում են առափնյա ծովային հետեւակային գնդեր, ԱՄՆ ծովային հետեւակի կորպուսի խոշոր վերակազմավորման մի մասն են, ինչը նախանշվել է նրա հրամանատար գեներալ Դեւիդ Բերգերի կողմից 2020 թվականին Force Design 2030 փաստաթղթում, նշում է Reuters-ը:
Այն ժամանակ Բերգերը նշել էր, թե ցանկանում է, որ այդ ստորաբաժանումները սերտորեն համագործակցեն Ճապոնիայի ինքնապաշտպանության ուժերի հետ՝ չինացի զինվորականների համար դեպի Խաղաղ օվկիանոս հեշտ մուտքը կանխելու համար:
Ի պատասխան նոր ստորաբաժանումների հնարավոր տեղակայման մասին հարցին՝ Չինաստանի ԱԳՆ պաշտոնական ներկայացուցիչ Վան Վենբինը երեքշաբթի օրը կայացած հերթական ճեպազրույցում ասել է, որ ԱՄՆ-ի եւ Ճապոնիայի միջեւ երկկողմ ռազմական համագործակցությունը «չպետք է վնաս հասցնի երրորդ կողմերի շահերին եւ տարածաշրջանային խաղաղությանն ու կայունությանը»:
Հայեցակարգի համաձայն՝ ծովային հետեւակայինները կրճատում են ինքնաթիռների քանակը եւ նետում իրենց թնդանոթային հրետանու եւ ծանր զրահատեխնիկայի մեծ մասը՝ հօգուտ հրթիռներով եւ անօդաչու սարքերով հագեցած ավելի փոքր «ապակենտրոնացած» ուժի, որը կարող է գործել վիճելի տարածքներում:
Ճապոնիայում կա 18 000 ԱՄՆ ծովային հետեւակային, որը ամենամեծ կենտրոնացվածությունն է Միացյալ Նահանգներից դուրս: Դրանց մեծ մասը բազավորված է Օկինավա գլխավոր կղզում:
