նախընտրելի դարձնել
2023 թվականի արդյունքներով համաշխարհային տնտեսության աճի հանրագումարային չափի կեսից ավելին բաժին կհասնի երկու երկրներին՝ Չինաստանին եւ Հնդկաստանին։ Ընդ որում, ընթացիկ տարվա վերջին գլոբալ տնտեսության համախառն ներքին արդյունքի աճը պետք է կազմի 3 տոկոսից պակաս։ Արժույթի միջազգային հիմնադրամի ղեկավար Քրիստալինա Գեորգիեւայի խոսքը մեջբերում է ՏԱՍՍ-ը։
«Չնայած զարգացած երկրների մեծ մասում զարմանալիորեն կայուն աշխատաշուկաներին եւ սպառողական ծախսերին, ինչպես նաեւ Չինաստանի տնտեսության աճի վերսկսման հետեւանքով առաջացած վերելքին, մենք ակնկալում ենք, որ 2023 թվականին համաշխարհային տնտեսության աճը կկազմի 3 տոկոսից պակաս: 2023 թվականին Հնդկաստանին եւ Չինաստանին բաժին կհասնի համաշխարհային տնտեսության աճի կեսը»,-ասել է նա։
Ընդ որում, անցյալ տարվա արդյունքներով համաշխարհային տնտեսության աճի տեմպերը զգալիորեն դանդաղել են՝ 6,1 տոկոսից հասնելով 3,4 տոկոսի։ Նվազումն առաջին հերթին կապված է Ուկրաինայում 2022 թվականի փետրվարի վերջին հակամարտության սրման հետ:
«2021 թվականին հաստատուն վերականգնումից հետո ցնցումների ծանր շրջան է սկսվել՝ կապված Ուկրաինայում Ռուսաստանի պատերազմի եւ դրա լայնածավալ հետեւանքների հետ. համաշխարհային աճը 2022 թվականին նվազել է գրեթե կիսով չափ՝ 6,1 տոկոսից հասնելով 3,4 տոկոսի։ Աճի տեմպերի դանդաղումը շարունակվում է նաեւ այս տարի»,-եզրափակել է Գեորգիեւան։
