նախընտրելի դարձնել
Արարատի մարզի Քաղցրաշեն համայնքի ծիրանի բերքն ապրիլի 13-ին տեղացած կարկուտի հետեւանքով մեծ վնասներ է կրել։ Ավելի քիչ տուժել են Նորաշեն, Նարեկ եւ Դվին համայնքները։ Այս մասին NEWS.am-ի հետ զրույցում ասաց Քաղցրաշենի վարչական Աշոտ Խալաթյանը։
«Այս տարվա համար մենք նախատեսել էինք ստանալ մոտ 2 հազար տոննայի չափ ծիրան, սակայն 80 տոկոսը վնասվել է։ Մեր գյուղում ծիրանագործությունը հիմնական աշխատանքներից մեկն է համարվում, եւ տուժել է մոտ 600 տնտեսություն։ Նրանցից շատերն էլ հենց միայն ծիրանագործությամբ են զբաղվում»,- նշեց Խալաթյանը։
Նրա խոսքով՝ համայնքում կան հակակարկտային կայաններ, սակայն դրանք կարկուտի պահին չեն գործել։
«Քանի որ կարկուտի սեզոնը մայիսից է սկսվում, պատրաստական աշխատանքներն ավարտին չէին հասել։ Ամեն դեպքում վերջին տարիներին նման դեպք չէր գրանցվել։ Մնացած պտուղների հետ խնդիր չի եղել, որովհետեւ այդ պահին ծիրանենիների պտուղներն ավելի մեծ էին, կարկուտը հեշտությամբ է վնասել»,- ասաց Խալաթյանը։
Խալաթյանի խոսքով՝ վնասների փոխհատուցման համար իրենք դիմել են մարզպետարանին․ «Գրեթե բոլորի բերքը եղել է ապահովագրված, այսինքն՝ միայն վնասի փոխհատուցում կստանանք, բայց շահույթ չենք ունենա»։
