ԵՀ նախագահ Ուրսուլա ֆոն դեր Լյայենն ասել է, որ Գազայի հատվածում հիվանդանոցին հարվածելն արդարացում չունի, բայց չի նշել ողբերգության մեղավորին, տեղեկացրել է AFP-ն։

Եվրահանձնաժողովի նախագահը օրենսդիրներին ասել է, որ «անհրաժեշտ է պարզել հիվանդանոցի պայթեցման» փաստերը։

Իսրայելը եւ պաղեստինցիները մեղադրում են միմյանց, հիվանդանոցի պայթեցման փաստն արդեն առաջ է բերել Իսրայելի դեմ բողոքներ Մերձավոր Արեւելքում։

Ֆոն դեր Լյայենը հայտարարել է, որ «մենք պետք է կրկնապատկենք մեր ջանքերը քաղաքացիներին պատերազմից պաշտպանելու հարցում»։ Նա նշել է, որ ՀԱՄԱՍ-ը պաղեստինցիների կրած տառապանքների հիմնական պատճառն է։ «ՀԱՄԱՍ-ը ահաբեկչական է։ Եվ պաղեստինցի ժողովուրդը տուժում է այդ ահաբեկչությունից»,- ասել է նա։

ԵՄ դիվանագիտության ղեկավար Ժոզեպ Բորելը ավելի կոշտ դիրքորոշում է որդեգրել իսրայելական արձագանքի մասշտաբների վերաբերյալ, որը վերաբերում է 2,3 մլն պաղեստինցիներին  Գազայի հատվածում։

«Մենք դատապարտում ենք ահավոր ահաբեկչական գրոհները, բայց ես կարծում եմ, որ մենք նաեւ պետք է դատապարտենք զոհերի փաստը քաղաքացիական բնակչության շրջանում»,- ասել է Բորելը խորհրդարանում։ «Մենք չենք կարող Գազայի բնակիչների վրա դնել  ՀԱՄԱՍ-ի ահավոր գործողությունների պատասխանատվությունը»։

Ելույթները խորհրդարանում եւ  բարձր մակարդակով տեսակոնֆերանսները ԵՄ-ում երեքշաբթի օրը ընդգծել են տարաձայնությունները ԵՄ ներսում՝ Իսրայելի եւ ՀԱՄԱՍ-ի միջեւ հակամարտության զարգացման հարցում։