Նախագահ Ջո Բայդենի 106 մլրդ դոլարի խնդրանքը մեծ խնդիրներ է առաջացրել Կապիտոլիումում, գրել է Politico-ն։

Հանրապետականները տարակարծիք են, թե արդյոք արժե միավորել օգնությունն Իսրայելին եւ Ուկրաինային, նրանցից շատերը պնդում են, որ գումարը վերանայվի։

Անգամ չորս առաջնահերթությունների՝ Ուկրաինայի, Իսրայելի, Թայվանի եւ հարավային սահմանի հանրապետական կողմնակիցներն են վատատեսորեն  տրամադրված օրինագծի առաջին քննարկումից հետո։

«Սպիտակ տան ծանրոցն իրականում մեռած է»,- ասել է սենատոր Մայք Ռաունդսը (հանրապետական)։

Սենատի բանալիները դեմոկրատների ձեռքում են, բայց նրանց պետք է հանրապետականների ինը կամ ավելի ձայն՝ պալատի միջոցով ինչ-որ բանի հասնելու համար։

Սենատի մեծամասնության ղեկավար Չաք Շումերը ցանկանում է շտապ միջոցներ ձեռնարկել։ Բայց կառավարական ֆինանսավորման ժամկետը նոյեմբերի 17-ին է եւ Ներկայացուցիչների պալատի խոսնակի բացակայությունը ժամանակի անբավարարություն է ստեղծում Սենատի համար։

Ուկրաինային լրացուցիչ օգնության առաքումը նախկինի պես տարաձայնություններ է առաջացնում Հանրապետական կուսակցությունում, որոշ հանրապետականներ ցանկանում են, որպեսզի  Սենատն առանձին դիտարկի Իսրայելին օգնության տրամադրման հարցը։

Մյուս կողմից՝  Սենատի բարձրաստիճան անդամ Ռոջեր Ուիքերը (հանրապետական, Միսիսիպիի նահանգ) հայտնել է, որ ինքը «աջակցում է այդ երկու հարցերի միավորմանը։

«Ես ցանկանում եմ, որպեսզի ամբողջ փաթեթն իրականացվի»,- ասել է սենատոր Լինդսի Գրեմը (հանրապետական, Հարավային Կարոլինա)։

Բայց եւ այնպես այս օրենսդրական ակտի բարդությունը կարող է հանգեցնել դրա կործանմանը։ Գազայի հատվածի հումանիտար օգնությունը «խնդիր» կլինի Հանրապետական կուսակցության համար, ասել է Սենատի փոքրամասնության ներկայացուցիչ Ջոն Թյունը (հանրապետական)։ Իսկ հանրապետականները ցանկանում են փոփոխություններ սահմանի վերաբերյալ ֆինանսավորման հարցում։ «Ստատուս-քվոն փոխելու համար ստիպված ենք բախվել որոշ փոփոխությունների սահմանի վերաբերյալ քաղաքականությունում, ինչն իրականում տեղի է ունենում»,-ասել է սենատոր Ջոն Քորնինը (հանրապետական, Տեխաս)։