Թուրքիայի Ազգային մեծ ժողովի (Խորհրդարանի) նախագահ Նուման Քուրթուլմուշը ստորագրել է օրինագիծ, որը վավերացնում է Շվեդիայի անդամակցությունը ՆԱՏՕ-ին, հայտնում է Aksam թերթը։

«Հյուսիսատլանտյան պայմանագրին Շվեդիայի միանալու մասին արձանագրության վավերացմանը հավանություն տալու մասին օրինագիծը ստորագրել է խորհրդարանի նախագահ Նուման Քուրթուլմուշը և ներկայացվել Արտաքին հարաբերությունների հանձնաժողովին»,- գրում է պարբերականը։

Ավելի վաղ հաղորդվել էր, որ Ռեջեփ Թայիփ Էրդողանը համապատասխան առաջարկ է ներկայացրել օրենսդիր մարմնի քննարկմանը։

Նախաձեռնության հիմնավորման մեջ ասվում է, որ «Ֆինլանդիան և Շվեդիան, որոնք դաշինքին միանալու համատեղ հայտ են ներկայացրել, համարվում են ՆԱՏՕ-ի երկու ամենամոտ գործընկերները»: Այն նաև նշում է, որ այդ երկրները, նույնիսկ դաշինքին միանալու ցանկություն հայտնելուց առաջ, դաշինքի անդամների հետ «համակողմանի և բազմակողմ համագործակցություն են իրականացրել»։

Բացի այդ, ասվում է, որ նրանք «առանձնանում են իրենց կարողություններով և հնարավորություններով պաշտպանության և անվտանգության առումով»:

Հելսինկին և Ստոկհոլմը 2022 թվականի մայիսին Ուկրաինայում ռուսական ռազմական գործողության մեկնարկի ֆոնին ՆԱՏՕ-ին անդամակցելու հայտ են ներկայացրել։ Այս տարվա ապրիլին Ֆինլանդիան դարձավ Հյուսիսատլանտյան դաշինքի 31-րդ անդամը, մինչդեռ շվեդական հայտը դեռևս պաշտոնական հավանություն չի ստացել Թուրքիայի և Հունգարիայի կողմից։

Շվեդիան, որպես Եվրամիության անդամ, Էրդողանի հետ բանակցություններում համաձայնել է աջակցել ԵՄ-ին Թուրքիայի անդամակցության գործընթացի ակտիվացմանը՝ դիմումը վավերացնելու դիմաց։ Միևնույն ժամանակ ՆԱՏՕ-ի գլխավոր քարտուղար Յենս Սթոլթենբերգը նշել է, որ այս երկու հարցերը «կապված չեն միմյանց հետ»։