Թուրքիայի Կոմունիստական կուսակցությունը (TKP) «ամոթալի» է անվանել այն, որ Ազգային մեծ ժողովի պատգամավորները քննարկելու են ՆԱՏՕ-ին Շվեդիայի անդամակցության արձանագրությունը, եւ կոչ են արել, որպեսզի Թուրքիան դուրս գա ՆԱՏՕ-ից։

Թուրքիայի խորհրդարանի արտաքին գործերի հանձնաժողովն սկսելու է ՆԱՏՕ-ին Շվեդիայի անդամակցության հայտի քննարկումը։ TKP-ն Թուրքիայի մաոիստական քաղաքական կուսակցություն է, հիմնվել է 1972թ. Թուրքիայի Աշխատավորների կուսակցության նախկին անդամ Իբրահիմ Քայփակեյի կողմից։

«Այդ հարցն ամոթալի է Թուրքիայի Ազգային մեծ ժողովի համար»,- նշվել է կուսակցության հայտարարությունում։ Նշվել է, որ Ուկրաինայում ճգնաժամն սկսվելուց հետո «Հյուսիսային Եվրոպայում նոր անդամներ ունենալու ՆԱՏՕ-ի փորձերը թափ են հավաքել»։ «Օրակարգ մտավ Ֆինլանդիայի եւ Շվեդիայի անդամակցության հարցը։ Գործընթացի առաջին արդյունքը դարձավ Ֆինլանդիայի ընդունումը այս տարվա մարտին։ Ցավոք, այս հարցում եւս Ազգային մեծ ժողովը լուրջ անհաջողություն ունեցավ՝ քվեարկելով Ֆինլանդիայի անդամակցության օգտին։

«Արեւմտյան իմպերիալիստական տերությունները, առաջին հերթին՝ ԱՄՆ-ն, կողմ են լարվածության պահպանմանը տարածաշրջանում»,- նշվել է կուսակցության հայտարարությունում, որը ՆԱՏՕ-ն անվանել է «ահաբեկչական կազմակերպություն»։

«Այն ի սկզբանե խաղաղություն չի բերել իր անդամներին եւ այլ երկրների ժողովուրդներին։ Հակառակը, ահաբեկություն է տարածել եւ կազմակերպել զանգվածային սպանություններ այն երկրներում, որոնց դեմ ուղղել է իր գործունեությունը։ Նա միջամտել է այլ երկրների ներքին գործերին կամ ուղիղ պատերազմ վարելով, կամ օգտագործելով հակապարտիզանական գործողությունների, սպանությունների եւ հեղաշրջումների տակտիկան։ Նա թույլ չի տվել աշխատավորներին ձայն բարձրացնել եւ չի երկնչել ամենաարյունալի նախաձեռնությունների ձեռնարկումից։ Աշխարհը պետք է ազատվի ՆԱՏՕ-ից։ Առաջին քայլն այդ ուղղությամբ մեր երկրի եւ մյուս անդամների դուրս գալն է ՆԱՏՕ-ից։ Ազգային մեծ ժողովի արտաքին գործերի հանձնաժողովը պետք է օրակարգ մտցնի ոչ թե ՆԱՏՕ-ի չընդլայնվելը, այլ Թուրքիայի դուրս գալն այդ արյունալի կազմակերպությունից»,- նշվել է հայտարարությունում։