Աշխարհի խոշորագույն բանկերը բարձրացրել են Միացյալ Նահանգների ռեցեսիայի իրենց կանխատեսումները

Աշխարհի խոշորագույն բանկերն ու վերլուծական կենտրոնները նոր մաքսատուրքերի պատճառով կտրուկ մեծացրել են Միացյալ Նահանգներում ռեցեսիայի (աստիճանական ետաճման) հավանականության աստիճանը։

Ինչպես հաղորդում է Reuters գործակալությունը, երբ Դոնալդ Թրամփն ապրիլի 2-ին հայտարարեց ներմուծման մաքսատուրքերի մասին, յոթ առաջատար ներդրումային բանկեր անմիջապես ավելացրին ԱՄՆ-ում տնտեսական անկման ռիսկի իրենց կանխատեսումները։

Օրինակ, J.P. Morgan-ն իր կանխատեսումը 40%-ից բարձրացրեց 60%-ի։ Goldman Sachs՝ սկզբում 20%-ից մինչև 35%, իսկ հետո մինչև 45%, հայտնում է DW-ն։ Ամերիկյան S&P Global վերլուծական կորպորացիան, որի մեջ մտնում է Standard & Poor's վարկանիշային գործակալությունը, իր կանխատեսումը 25%-ից բարձրացրել է 30-35%-ի։ Բրիտանական HSBC բանկը մաքսատուրքերի պատճառով ԱՄՆ-ում ռեցեսիայի հավանականությունը գնահատում է 40%:

ԱՄՆ տնտեսության ռեցեսիայի ռիսկի մասին զգուշացրել են նաև Bank of America-ն, Royal Bank of Canada-ն, բրիտանական Barclays-ը, գերմանական Deutsche Bank-ը և շվեյցարական UBS-ը:

Ապրիլի 2-ին Թրամփը հայտարարեց 185 երկրներից ԱՄՆ ներմուծվող ապրանքների նկատմամբ մաքսատուրքեր սահմանելու մասին։ Բազային դրույքաչափը կազմում էր 10%, բայց շատ պետությունների համար դրանք ավելի բարձր են: Չինաստանից ապրանքների մաքսատուրքերը կազմել են 34%, ԵՄ երկրներից՝ 20%, Շվեյցարիայից՝ 31%, Իսրայելից՝ 17%, Ղազախստանից՝ 27%։ Բացառություններ են արվում միայն մի շարք երկրների, դրանց թվում՝ Ռուսաստանի, Հյուսիսային Կորեայի, Կուբայի և Բելառուսի համար։ 25% հարկ է մտցվել ԱՄՆ ներմուծվող ավտոմեքենաների և պահեստամասերի նկատմամբ։

Մաքսատուրքերի ներդրումը համաշխարհային ֆինանսական և ապրանքային շուկաներում հանգեցրել է լուրջ անկման։ Նյու Յորքում ապրիլի 4-ին Dow Jones-ի ինդեքսը հասել է 2024 թվականի կեսերից ի վեր ամենացածր մակարդակին։ Շաբաթվա կորուստները գերազանցել են 8%-ը՝ սա ինդեքսի համար վերջին տարիների ամենաանշահավետ շաբաթն է։

Ճապոնական Nikkei ինդեքսը, որը ներառում է 225 ընկերություն, ապրիլի 7-ի առավոտյան նվազել է ավելի քան 8%-ով: Առավոտյան առևտրի ընթացքում զգալի կորուստներ են գրանցվել Չինաստանի, Հոնկոնգի և Ավստրալիայի բորսաներում: Գերմանական DAX ֆոնդային ինդեքսը ապրիլի 7-ին սակարկությունների սկզբում նվազել է գրեթե 10%-ով։