Բրիտանացի գիտնականը վերջին տասնհինգ տարիներն անցկացրել է աշխարհի քաղաքների «հոտային լանդշաֆտն» ուսումնասիրելով եւ փաստաթղթավորելով, եւ այժմ հրատարակում է ատլաս, որը փորձում է արտացոլել այդ եզակի բույրերը, տեղեկացրել է The Guardian-ը։

Քենթի համալսարանի դիզայներ եւ հետազոտող, դոկտոր Քեյթ Մաքլին-Մակքենզին նշել է, որ մեր մշակույթում զգալի անհամապատասխանություն կա, թե ինչպես ենք մենք փոխանցում մեզ շրջապատող աշխարհի տարբեր կողմերի մասին տեղեկատվությունը. մենք լուսանկարում եւ ներկայացնում ենք տեսողական պատկերներ, ձայնագրում եւ տարածում ենք ձայներ, բայց հոտերը գրանցելու եւ փոխանցելու ունակություն գործնականում գոյություն չունի։

Այս բացը լրացնելու համար Մաքլին-Մակքենզին մշակել է «հոտային զբոսանքների» հայեցակարգը. կամավորները զբոսնում են փողոցներով՝ արձանագրելով ոչ միայն հոտերը, այլեւ դրանց ինտենսիվությունը, տեւողությունը, անսպասելիությունը եւ դրանց առաջացրած ցանկացած ասոցիացիա։ Նա վերլուծում է հավաքված տվյալները եւ դրանք վերածում վիզուալ քարտեզների, որոնք արտացոլում են որոշակի վայրի հոտային էությունը եւ այդ հոտերի հետ կապված մշակութային պատմությունը։

«Հոտերի ատլասն» արդեն իսկ ընդգրկում է գրեթե քառասուն քաղաք, այդ թվում՝ Ամստերդամը, Կալկաթան, Փարիզը, Գլազգոն, Էդինբուրգը եւ Վերոնան: Այդ քարտեզները չեն արտացոլում «կատարյալ» կամ մշտական ​​​​բույրերը, այլ փոխանցում են հոտերի անցողիկ բնույթը՝ բույրի աղբյուրը զբոսանքի պահին եւ այն վայրը, որտեղ այն կարող է տարածվել: Օրինակ, մասնակիցներից մեկը Նյու Յորքում գիշերային զբոսանքի հոտը նկարագրել է որպես «կոտրված երազների հոտ»՝ նկատի ունենալով մայթեզրին հնացած գարեջրի հոտը:

Մաքլին-Մակքենզիի խոսքով՝ նման քարտեզների նպատակը պարզապես հոտերը նույնականացնելը չէ, այլ դրանք անվանելը եւ մարդկային փորձի համատեքստում դրանց իմաստ հաղորդելը: Ատլասը կարող է ծառայել որպես պատմական գրառում այն ​​​​մասին, թե ինչ հոտ ունեն քաղաքներն այսօր, քանի որ այս ընկալումները կարող են արմատապես փոխվել ապագայում, օրինակ՝ էլեկտրական մեքենաների տարածման հետ:

Նա նաեւ հույս ունի, որ ատլասը կոգեշնչի մարդկանց ավելի ակտիվորեն օգտագործել իրենց բոլոր զգայարանները՝ շրջապատն ուսումնասիրելիս, եւ ավելի ուշադիր լինել, թե ինչպես են հոտերը ձեւավորում մեր տպավորությունները վայրերի եւ իրադարձությունների վերաբերյալ: