Երեւանյան հոգեբուժարաններից մեկում երկու օր առաջ ինքնասպանություն գործած կինը տարիներ առաջ նույն կերպ սպանել էր իր երկու անչափահաս երեխաներին:
NEWS.am-ի տեղեկություններով՝ պատուհանի ճաղավանդակից շարֆով կախված կինը Ռոզա Ա.-ն է, որը 2011թ. սեպտեմբերի 6-ին սպանել էր իր 6-ամյա եւ 4-ամյա երեխաներին:
Հիշեցնենք, որ 2011թ. սեպտեմբերի 6-ին` առավոտյան, Արարատի մարզում Ռոզա Ա.-ն երեխաների հետ գնացել էր խանութ, առեւտուր արել, ապա վերադարձել տուն եւ կերակրել նրանց: Ինչպես ինքն է հայտնել ոստիկանությանը՝ իրեն միայնակ զգալով եւ իր կյանքը համարելով ավարտված, կինը որոշել է խեղդամահ անել երեխաներին, ապա վերջ տալ նաեւ իր կյանքին: Այդ նպատակով նույն օրը՝ ժամը 12:00-ի սահմաններում, նա իրեն պատկանող շարֆը կապել է խոհանոցի դռան վերեւում գտնվող ջրատար խողովակին, դրա վրա արել հանգույց եւ ավագ որդուն, կախելով այդ հանգույցից, խեղդամահ է արել:
Այնուհետեւ խոհանոցի պատին ամրացված կախիչից ամրացնելով սավանից պատրաստված մեկ այլ օղակ` դրանից կախել եւ խեղդամահ է արել նաեւ կրտսեր որդուն: Այս ամենից հետո երեխաների դիակները տեղափոխել է մահճակալի վրա, պառկել նրանց կողքին, սավանը փաթաթել իր պարանոցին եւ փորձել իրեն խեղդելով կյանքին վերջ տալ, սակայն չի կատարել իր մտադրությունը, ապա հեռացել տնից:
Լուսանկարը՝ Արտակ Եղիազարյանի/NEWS.am