Ավստրալիայում անշարժ գույքի գործակալություններից մեկի աշխատակիցները արտասովոր ակցիա են ձեռնարկել՝ տուն գնող հաճախորդներին մեկ տարվա ընթացքում շաբաթական մեկ անգամ տրամադրելու են ավոկադոյով անվճար տոստեր, հայտնում է BuzzFeed-ը։

Ընդ որում գնորդը կարող է ինքը ընտրել , թե որ սրճարանից է ուզում ստանալ անվճար տոստը։ Առաջարկը տարածվում է անշարժ գգույքի մի քանի օբյեկտների վրա։ Դրանցից մեկը Շերվուդում գտնվող 600 հազար դոլար արժողության թաունհաուզն է, որտեղ կան երեք ննջասենյակ ու երկու լոգարան։ Նշում են, որ եթե տունը զույգ է գնում՝ նրանց շաբաթական երկու տոստ են առաջարկելու։

Այսպիսով ռիելթորները մտադիր են խթանել բնակարանների վաճառքը։ Պորտալի տեղեկություններով, այս ակցիայի շրջանակում արդեն մեկ տուն է վաճառվել։ Անցած տարվա օգոստոսին Լաս Վեգասում 22 մլն դոլար արժողության փենթհաուզի գնորդին խոստացել էին Lamborghini Huracan մեքենա տրամադրել երկու տարվա գործածման համար, նաեւ Պաբլո Պիկասոյի ու Սալվադոր Դալիի նկարները եւ T-Mobile Arena-ում անցկացվող միջոցառումների տոմսեր։ Palms Place Hotel երկնաքերի 59-րդ հարկում գտնվող փենթհաուզի ընդհանուր մակերեսը մոտ 580 քառ մետր է։ Այն ունի չորս ննջասենյակ ու վեց լոգարան։