Գյումրիի ծննդատան նախկին գործադիր տնօրեն Վարդան Սարգսյանը չի հերքում, որ ծննդատանը չարաշահումներ են հայտնաբերվել: NEWS.am-ի հետ զրույցում Վարդան Սարգսյանը կարծիք հայտնեց, որ դրանք զուտ տնտեսական աճի հետեւանքով են եղել:
«Ավելի շատ ծախսերի ոչ ռացիոնալ բարձրացումն է, ոչ ադեկվատ ծախսեր են կատարվել: Իսկ թե ինչպիսի հանգուցալուծում կստանա իրավիճակը, չեմ կարող ասել, որովհետեւ դա կախված է աուդիտից: Դրանից հետո պարզ կդառնա, օրենքով նախատեսված խախտում է, թե՝ ոչ: Հետեւանքները եւս կպարզվեն քննությունից հետո»,- ասաց նա:
Վարդան Սարգսյանը Գյումրու ծննդատան տնօրենն է եղել 2014 թվականից մինչեւ 2017-ի դեկտեմբեր, իսկ Շիրակի մարզպետարանն այստեղ աուդիտ է անցկացրել 2018 թվականի հունվար-ապրիլ ժամանակաշրջանի համար, նրա խոսքով՝ այսպես ասած, ընդունում-հանձնում է եղել: Աուդիտի արդյունքում ֆինանսական խնդիրներ են հայտնաբերվել, սակայն Վարդան Սարգսյանը չի շտապում դրանք չարաշահում անվանել. ասում է՝ քննությունից հետո պարզ կլինի:
Հիշեցնենք, որ Շիրակի նորանշանակ մարզպետ Կարեն Սարուխանյանը Գյումրիի ծննդատանը կատարված ֆինանսական աուդիտի հաշվետվությունը, որտեղ մի շարք չարաշահումներ են հայտնաբերվել, ուղարկել է մարզի դատախազ Կարեն Գաբրիելյանին: