IOS 14.5 օպերացիոն համակարգի նոր տարբերակում կհայտնվեն լրացուցիչ էմոջի-սմայլիկներ, որոնք նախկինում չկային: Նոր հնարավորություններից բացի, iOS 14.5-ը iPhone-ի օգտվողներին կնվիրի վիրակապված սիրտ, պարուրաձեւ աչքերով դեմք եւ... մորուքավոր կանանց:
Ինչպես հայտնում է Popmech-ը, հղում անելով Emojipedia-ին, էապես կընդլայնվի զուգակցված էմոջիների «ձեւավորման» հնարավորությունը՝ զույգերով մարդկանց համար մաշկի գույների ավելի շատ տարբերակներ կառաջարկվեն: Մաշկի երանգների ներկապնակը կընդլայնվի նաեւ մորուքավոր մարդկանց համար, իսկ մորուքավոր տղամարդու նոր տարբերակում կավելանա մորուքավոր կին:
Չեն խուսափել նաեւ Apple-ի սարքերում առկա սմայլիկների «փոփոխություններից»: Այսպես, ալպինիստի սմայլիկը լրացրել են գլխին պաշտպանիչ սաղավարտով, արյան կաթիլով ծանոթ ներարկչից հանել են նույն արյան կաթիլը, իսկ սովորական ականջակալները փոխարինվել են նոր AirPods Max անլար ականջակալներով, որոնք Apple շարքում առաջին լայնաչափ ականջակալներն են դարձել:
