Ֆլորիդայի նահանգապետ Ռոն Դեսանտիսը ստորագրել է «Սրտի զարկերի պաշտպանության մասին» (Heartbeat Protection Act) օրենքը, որն արգելում է հղիության վեցերորդ շաբաթից հետո աբորտի անցկացումը։ Այս մասին հաղորդվում է նահանգապետի պաշտոնական կայքում հրապարակված հաղորդագրության մեջ։
Նոր օրենքն արգելում է հղիության արհեստական ընդհատումը այն ժամանակ, երբ ապագա երեխայի մոտ սրտի բաբախ կա։ Օրենքով նախատեսվում է նաեւ 25 միլիոն դոլարի հատկացում նահանգի պերինատալ կենտրոններին:
«Նահանգապետ Դեսանտիսը պատմական միջոցներ է ձեռնարկել՝ մարդկային կյանքի արժեքը պաշտպանելու եւ Ֆլորիդան ընտանիքի համար բարենպաստ նահանգ դարձնելու համար»,- ասվում է հայտարարության մեջ։ «Ստորագրվել է սրտի զարկերի պաշտպանության մասին օրենք, որն ընդլայնում է կյանքի պաշտպանությունն ու երիտասարդ մայրերին եւ ընտանիքներին օգնելու համար ռեսուրսներ է հատկացնում», - Twitter-ում գրել է Դեսանտիսը:
Սպիտակ տունը քննադատել է այդ միջոցը դեռ օրինագծի փուլում։ «Նախագահը եւ փոխնախագահը կարծում են, որ կանայք պետք է կարողանան իրենց առողջությանը վերաբերող որոշումները կայացնել իրենց բժիշկների եւ ընտանիքների հետ՝ առանց քաղաքական միջամտության», - ասել է Սպիտակ տան մամուլի քարտուղար Կարինե Ժան Պիերը:
Ավելի վաղ ԱՄՆ Գերագույն դատարանը չեղյալ էր համարել 1973 թվականի «Ռոուն ընդդեմ Ուեյդի» գործով որոշումը, որի համաձայն դաշնային կառավարությունը երաշխավորում է հղիության արհեստական ընդհատման վերաբերյալ իրավունքները: Գերագույն դատարանի միայն երեք դատավորներ դեմ են արտահայտվել չեղարկմանը, վեց դատավորներ քվեարկել են չեղյալ համարելու օգտին, որոնցից երեքը նշանակվել են հանրապետական նախկին նախագահ Դոնալդ Թրամփի կողմից:
