Ավստրալիայում ներման է արժանացել Քեթլին Ֆոլբիգը, որը 20 տարի նստել է բանտում իր չորս երեխանեի սպանության համար, տեղեկացրել է Reuters-ը։

2003թ.  Նոր Հարավային Ուելս նահանգի դատարանը Քեթլին Ֆոլբիգին մեղավոր էր ճանաչել իր երեխաների՝ 19 օրական Կալեբի, քառամսյա Փատրիկի եւ տասն ամսական Սառայի սպանության մեջ։ Կնոջը դատապարտել էին նաեւ մեկուկես տարեկան դստեր՝ Լորայի չկանխամտածված սպանության համար։

Քննության վարկածով՝ Ֆոլբիգը 1989-1999թթ. ընթացքւոմ խեղդամահ է արել իր երեխաներին։ Սակայն իրեղեն ապացույցներ եւ հետքեր չէին հայտնաբերվել։ Մեղադրանքը կառուցվել էր անուղղակի հանցանշանների հիման վրա՝ գրառումներ կնոջ օրագրում, որոնցում նա իրեն մեղադրում էր փոքրիկների մահվան մեջ։ Ամբողջ դատավարության ընթացքում Ֆոլբիգը պնդել է, որ անմեղ է, եւ որ իր երեխաները մահացել են բնական պատճառներից։