նախընտրելի դարձնելԵվրասիա համագործակցության հիմնադրամի կողմից կազմակերպված ծրագրի շրջանակներում Հայաստան ժամանած թուրքական CNNturk հեռուստաընկերության լրատվական բաժնի խորհրդատու Ֆերհաթ Բորաթավը եւ Milliyet օրաթերթի թղթակից Քադրի Գյուրսելը հայ լրագրողների հետ զրույցում անդրադարձան հոկտեմբերի 10-ին ստորագրված հայ-թուրքական արձանագրությունների վավերացման հավանականությանը Թուրքիայում՝ ԱՄՆ-ի կողմից Թուրքիայի վրա Ցեղասպանության ճանաչման սպառնալիքի միջոցով:
Ֆերհաթ Բորավաթը այսօրվա իրավիճակը համեմատեց 6.5 տարի առաջվա իրավիճակի հետ, երբ թուրքական խորհրդարանը դեմ քվեարկեց ԱՄՆ զորքերին Թուրքիայի տարածքով Իրաք մտնելուն: Ըստ բանախոսի, այդ ժամանակ եւս դա լուրջ վտանգ էր Թուրքիայի-ԱՄՆ հարաբերությունների հետագա ընթացքի համար, սակայն թուրքական խորհրդարանը հաշվի չառավ այդ հանգամանքը: Հյուրերը համոզված էին, որ այս օրինակը կարող է կրկնվել նաեւ ստորագրված արձանագրությունների վավերացման հետ կապված խնդրում:
Թուրք լրագրողները նշեցին, որ ԱՄՆ-նախագահ Բարաք Օբաման թույլ չի տա Կոնգրեսին ճանաչել Հայոց ցեղասպանությունը, քանի որ դա Թուրքիայում կունենա երկրաշարժի ազդեցություն, իսկ ԱՄՆ-ը չի ցանկանում այս տարածաշրջանում խնդիրներ ունենալ:
«Հայոց ցեղասպանության խնդիրը դամոկլյան սրի պես կախված է Թուրքիայի գլխին: Թուրքիայում շատերը երանի են տալիս, որ Օբաման ճանաչի Հայոց ցեղասպանությունը եւ վերջապես տեսնեն թե ինչ է լինելու դրանից հետո: Ստորագրված հայ-թուրքական արձանագրությունները վավերացվելուց հետո էլ տարբեր երկրների խորհրդարաններում կշարունակվեն ընդունվել Հայոց Ցեղասպանության ճանաչման բանաձեւեր»,-նշեց Milliyet-ի թղթակիցը:
Անդրադառնալով մինչքեմալական Թուրքիայում տեղի ունեցած հայտնի դատավարություննեին, որով հայերին կոտորելու համար հեռակա կարգով մահվան էին դատապարտվել Թալեաթ, Էնվեր, Ջեմալ փաշան եւ այլոք, CNNturk-ի լրագրողը նշեց, որ Թուրքիան չի ընդունում այդ դատավարությունները, քանի որ դրանք տեղի են ունեցել այն ժամանակ, երբ Թուրքիան գտնվում էր Արեւմտյան տերությունների օկուպացման տակ եւ այդ դատարանների վրա ճնշում է եղել:
Բանախոսները հիշեցրեցին, որ 1915 թվականի դեպքերի հետ կապված Թուրքիայում շատերը տեղեկություններ պարզապես չունեն:
