նախընտրելի դարձնելԿոտայքի մարզի Բջնի գյուղից 2 շաբաթ առաջ կորած եւ նույն մարզի Ջրաշեն գյուղում հանգրվանած 1 միլիոն արժողության 4 ցլիկները հայտնաբերվել են: Այս մասին NEWS.am-ի թղթակցի հետ զրույցում տեղեկացրեց Բջնի գյուղի գյուղապետ Արմեն Մաթեւոսյանը: Նրանից տեղեկացանք, որ ցլիկներին գտած եւ իրենց գոմում հյուրընկալած ջրաշենցի ընտանիքը ցլիկներին հետ վերադարձնելու համար 200 հազար դրամ գումար է պահանջել, որպես փոխհատուցում 2 շաբաթ նրանց կերուխումը ապահովելու, ինչպես նաեւ իրենց գոմում ապաստան տալու համար: Սակայն ցլիկների տերերը չեն համաձայնվել այդ պահանջի հետ:
Երկար-բարակ վեճից հետո մասնագետ են հրավիրել, ով հաշվարկել է ցլիկների «հյուրընկալման» ամբողջական ծախսերը, որը, ըստ մասնագետի 60 հազար դրամ է կազմել:
«Մեր բջնեցիներն էլ 60 հազար դրամը վճարեցին, գնացին: Բայց այնպես էլ չէր, որ ցլիկներին գողացել էին կամ հովիվին էին տվել, ում անուշադրության հետեւանքով ցլիկները կորել էին»,- նկատեց գյուղապետը:
Ի դեպ, կորած ցլիկներին տիրանալու համար շատերն են գնացել նրանց վերցնելու, սակայն ցլիկներին գտած ընտանիքը պահանջել է, որ ցլիկներին բնորոշ նշաններով բնութագրեն նրանց, ինչը, սակայն, բացի իրական տերերից ոչ ոքի չի հաջողվել: Հարկ է նկատել, որ նույն ընտանիքին պատկանող 2 ցլիկ դեռ կորած են, եւ որոնողական աշխատանքները դեռ շարունակվում են:
Գյուղապետի փոխանցմամբ, գործը հասել է նաեւ ոստիկանություն, սակայն, քանի որ առեւանգման հանցակազմ չկա, ոստիկանությունը չի կարող գործին ընթացք տալ:
