նախընտրելի դարձնել1970 թ-ի այս օրը`օգոստոսի 29-ին, առաջին անգամ էկրան է բարձրացել Սերգեյ Փարաջանովի «Նռան գույնը» ֆիլմը: Մի քանի պատումներից կազմված ֆիլմը նկարահանվել է 1968 թ-ին «Հայֆիլմ» կինոստուդիայում:
Ֆիլմի միջոցով փորձ է կատարվել փոխանցել հայ հանճարեղ բանաստեղծ, երգիչ, աշուղ Սայաթ-Նովայի հոգեւոր աշխարհը: Երկխոսություններից զուրկ տեսարաններում խորհրդանիշների եւ այլաբանության լեզվով ռեժիսորը պատմում է երգչի մանկության, պատանեկության, հասունության, սիրո, մահվան եւ անմահության մասին: Ֆիլմի հեղինակային տարբերակը ցուցադրության է արտոնվել միայն Հայաստանում: Հետագայում Սերգեյ Յուտկեւիչի մոնտաժած տարբերակը ընդունվել է համամիութենական ցուցադրության:
Երիտասարդ Սայաթ-Նովայի, Աննա թագուհու, «ժանյակներով աղջկա», պոետի մուսայի, համբարձման հրեշտակի դերը կատարել է ազգությամբ վրացի նշանավոր դերասանուհի Սոֆիկո Ճիաուրելին: Մանուկ Սայաթ-Նովային կերպավորել է Մելքոն Ալեքսանյանը:
Ֆիլմր նկարահանվել է Սրբանեսի (Սուրբ Հովհաննեսի կամ Հովհան Օձնեցու) վանքում (8-17-րդ դդ), որը գտնվում է Լոռիի մարզի Արդվիգյուղի մոտակայքում:
Սերգեյ Փարաջանովը 20-րդ դարի կինոյի խոշորագույն նորարար ռեժիսորներից մեկն է:
Փարաջանովը ծնվել է 1924 թ-ի հունվարի 9-ին Թիֆլիսում: Ռեժիսորի թողած ժառանգության մեջ ամենավառ կերպով ներկայացված է Կովկասի բազմազանությունը։ Նկարել է «Մոռացված նախնիների ստվերները» (1964), «Սուրամի ամրոցի լեգենդը» (1984), «Աշուղ ղարիբը» նշանավոր ֆիլմերը:
Կյանքի վերջին տարիներին Փարաջանովը նկարում էր ինքնակենսագրական «Խոստովանանք» ֆիլմը, որն անավարտ մնաց եւ հետագայում ամբողջությամբ օգտագործվեց ՄիքայելՎարդանովի «Փարաջանով։ Վերջին Գարուն»(1992)վավերագրական ֆիլմում։
Փարաջանովը մահացել է քաղցկեղից` 1990 թ-ի հուլիսին,Երեւանում:
