Նախընտրելի
Ամանորի նախաշեմին առեւտուրը, հատկապես սննդամթերքի մասով, նկատելիորեն ակտիվանում է: Պահանջարկ վայելող մթերքներից է հատկապես միսը:
Անցած տարվա դեկտեմբերին մսի արտադրության ծավալը կենդանի քաշով կազմել է 33,2 հազ. տոննա, այսինքն, տեսակարար կշռով մոտ 6-7 կգ` մեկ շնչի համար: Վերջին թվերը մեր իրականության համար բավականին ֆանտաստիկ են թվում, սակայն այդպիսին են պաշտոնական վիճակագրության ցուցանիշները:
Նկատենք, որ մինչեւ դեկտեմբեր մսի արտադրության միջին ամսական ցուցանիշը կազմել է ընդամենը 8,6 հազ տոննա` կենդանի քաշով: Դեկտեմբերի նման աճը, անկասկած, պայմանավորված է նախատոնական պահանջարկով:
Ընդհանրապես գների աճն սկսում է նոյեմբերին, երբ, օրինակ, Երեւանում տավարի մսի կիլոգրամի գինը գրեթե 2,5 հազ. դրամ էր:
Շատերը հավանաբար դեռեւս տոների համար միս չեն գնել, ուստի ավելորդ չենք համարում ներկայացնել ապրանքը գնելու մի քանի ճիշտ խորհուրդներ, որոնք տրվում են փորձառու մսավաճառ-մասնագետի կողմից:
Ներկայումս կազմակերպված շուկայում կիրառվում են ճշգրիտ կշեռքներ, այնպես որ թերակշռման խնդիրներ չկան: Սակայն ոչ փորձառու գնորդները կարող են խաբվել մսագործի հնարքներին, երբ միսն այնպես է կտրտվում, որ մի կողմից երեւում է առողջ ոսկորը, մուս կողմից` մսի լայն շերտը: Իրականում այդ շերտը հաստ ոսկորի համամետ բավական փոքր է: Արդյունքում «մսի» կտորի մեծ մասը հենց ոսկորն է կազմում:
Մեկ այլ հնարքի դեպքում վաճառողն ապրանքին աննկատ ավելացնում է մի կտոր, սովորաբար, ոսկոր ոչ առաջին թարմության մսի շերտով, ինչ էլ գնորդն արդեն նկատում է տանը:
Մասնագետը գնորդներին խորհուրդ էտալիս սկզբում ուշադիր նայել դրվող մսի կտորները: Որակյալ ապրանքը սովորաբար բաց գույն է ունենում, իսկ ահա մուգ կտորները վկայում են, որ այն թարմ չէ: Ճարպոտ մասերը եւս պետք է բաց լինեն, ոչ թե դեղին կամ մուգ: Կտրտված միսը սովորաբար ձիգ չի լինում եւ ձեոք տալու դեպքում կպչում է ձեռքին: Ահա եւ խորհուրդների ողջ «փաթեթը», ինչը թույլ կտա չսխալվել տոնական գնումների ժամանակ:
