նախընտրելի դարձնել
Հայ ժողովուրդը պասիվ է բողոքում՝ լքելով իր երկիրը: Այս մասին այսօր՝ հուլիսի 24-ի մամուլի ասուլիսում հայտնել է Ղարաբաղի պատերազմի վետերան, Հայաստանի եւ Լեռնային Ղարաբաղի հույների «Պատրիդա» միության նախագահ Էդուարդ Պոլատովը՝ խոսելով հասարակական տրանսպորտի սակագնի թանկացման մասին:
Մամուլի ասուլիսի մյուս բանախոս, ասորիների «Աթուր» միության նախագահ, Հայաստանի վաստակավոր դերասան Ռազմիկ Խոսրոյեւը նշել է, որ երկրում թանկացումները մարդու իրավունքների խախտում են: Նա ընդգծել է, որ Հայաստանում տրանսպորտի սակագնի թանկացման դեմ ուղղված բողոքի ցույցերը հայ հասարակության զարգացման համար առաջընթաց քայլ են:
Մամուլի ասուլիսի երրորդ բանախոս, եզդիների հասարակական կազմակերպության նախագահ Ամո Շարոյանը հայտնել է, որ գործազրկությունը եւ արտագաղթը հենց տարատեսակ թանկացումների հետեւանքներն են:
NEWS.am-ն ավելի վաղ հայտնել էր, որ Երեւանում ուղեւորատար ավտոբուսների եւ երթուղայինների սակագինը 100 դրամից դարձել է 150 դրամ, իսկ տրոլեյբուսներինը՝ 50 դրամի փոխարեն 100 դրամ: Քարոզարշավի ժամանակ Երեւանի քաղաքապետ Տարոն Մարգարյանը ընտրողներին խոստացել էր, որ տրանսպորտի գինը չի թանկանալու:
