նախընտրելի դարձնել
Բելգիական La Derniere Heure թերթի խմբագրությունը նամակ է ստացել, որում Բելգիայի թագավորի ավագ դստեր հասցեին սպառնալիքներ են գրված:
Բելգիայի Ֆիլիպ թագավորին հասցեագրված «ռասիստական եւ նեոնացիստական» նամակում նրա դստերը՝ գահի ժառանգորդ արքայադուստր Էլիզաբեթին առեւանգելու սպառնալիք է պարունակվում:
Խմբագրությունը հայտնում է, որ նամակի մի մասը գերմաներեն է, մյուսը՝ ֆրանսերեն: Բացի այդ, վերնագրի փոխարեն հեղինակը «գազանի թիվն» է օգտագործել՝ 666, նաեւ՝ գույներով ու ձեւով նացիստական դրոշ հիշեցնող խորհրդանիշ:
Նամակագիրն այդպես ցանկացել է երկրի միգրացիոն քաղաքականության վերաբերյալ իր դժգոհությունը հայտնել:
Նամակում ատելությամբ է խոսվում մահմեդական երկրներից եկածների նկատմամբ, որոնց հեղինակը համարում է երկրի տնտեսական դժվարին կացության պատճառը:
Ըստ նրա՝ բոլոր արտասահմանցիները, հատկապես մահմեդականները, մեղավոր են Բելգիայի տնտեսական խնդիրների համար, որն ամեն օր եկվորների պատճառով կորցնում է 30 միլիարդ եվրո:
Ոստիկանությունն ուժեղացրել է Էլիզաբեթի եւ թագավորական ամբողջ ընտանիքի պաշտպանությունը: Դպրոցը, որտեղ սովորում է 12-ամյա Էլիզաբեթը, գտնվում է անվտանգության գործակալների եւ ոստիկանության հսկողության տակ:
