նախընտրելի դարձնելՈստիկանությունը հայտնաբերել է Լոռու մարզում ոսկեղենի խանութի վրա կատարված հարձակման երրորդ մասնակցին:
Հիշեցնենք, որ նոյեմբերի 19-ին, ժամը 16.55-ին, ոստիկանության Թումանյանի բաժին էր ահազանգել 1967 թ. ծնված Գարեգին Հ.-ն եւ հայտնել է, որ դիմակավորված 3 անհայտ քաղաքացիներ հարձակվել են իրենց պատկանող խանութի վրա, ատրճանակի նմանվող իրով սպառնացել վաճառողուհուն եւ հափշտակել տարբեր տեսակի ոսկյա զարդեր:
Մեկնած օպերատիվ խումբը պարզել էր, որ նույն օրը, ժամը 16.30-ի սահմաններում, ատրճանակներով զինված երեք դիմակավորված անձ Թումանյան փողոցում գտնվող, 1971 թ. ծնված Գայանե Գ.-ին պատկանող խանութից հափշտակել են ոսկյա զարդեր: Նույն օրը, ժամը 23.45-ին, ոստիկանության Լոռու մարզային վարչության, Թումանյանի եւ Տարոնի բաժինների ծառայողները Ալավերդի քաղաքի Լենհանքեր թաղամասի ճանապարհին հայտնաբերել եւ ավազակային հարձակում կատարելու կասկածանքով ձերբակալել են 1992 թ. ծնված Հովհաննես Մ.-ին եւ 1992 թ. ծնված Անդրանիկ Մ.-ին: Նույն թաղամասում կատարված տեղանքի զննությամբ հայտնաբերվել եւ վերցվել էին 38 կտոր ոսկյա զարդեր:
Ձեռնարկված միջոցառումների շնորհիվ պարզվել է, որ ինքնությունը չպարզված երրորդ անձը 1985 թ. ծնված Սերիկ Հ.-ն է, որը ոստիկանության ծառայողների բացատրական աշխատանքների շնորհիվ, դեկտեմբերի 1-ին, ժամը 19.20-ին, կամավոր բաժին է ներկայացել:
