Տեւականության առումով այս տարի Հայաստանում շոգերն աննախադեպ են օդերեւութաբանական պատմության մեջ. Հայաստանում վերջին 170 տարիների ընթացքում նման տեւական շոգեր չեն եղել: Այս մասին NEWS.am-ի թղթակցի հետ զրույցում նշել է ՏԿԱԻՆ «Հիդրոմետ» ծառայության օդերեւութաբանության կենտրոնի պետի տեղակալ Գագիկ Սուրենյանը:

Նրա խոսքով, հուլիս-օգոստոս ամիսներին Հայաստանում գրանցվել է երեք խոշոր ջերմային ալիք, որոնք հանրապետություն են ներթափանցել Սաուդիան Արաբիայի տարածքից եւ Մերձավոր Արեւելքից: «Առաջինը եղել է հուլիսի 1-ից 10-ը, երբ օդի ջերմաստիճանը Արարատյան դաշտում, Երեւանում եւ Սյունիքի հովիտներում բարձրացել է 39-40 աստիճան, իսկ առանձին օրերին Երեւանում գրանցվել է 41 աստիճան տաքություն:

Այնուհետեւ այդ ալիքը ընդհատվել է, սակայն հուլիսի 25-ից սկսվել է երկրորդ ջերմային ալիքը, որը տեւել է մինչեւ օգոստոսի 6-ը: Արդյունքում, օդի ջերմաստիճանը բարձրացել է 39-40 աստիճան, առանձին հատվածներում գրանցվել է 41 աստիճան, իսկ Մեղրիում ջերմաստիճանը հասել է մինչեւ 42 աստիճան:

Օգոստոսի 7-ից օդի ջերմաստիճանը նվազել է եւ արդեն ամսի 8-ին եւ 9-ին մայրաքաղաքում գրանցվել է 33-34 աստիճան տաքություն»,-նշել է Սուրենյանը:

Նրա ներկայացմամբ, օգոստոսի 10-ից սկսվել է երրորդ ջերմային ալիքը, որը հանրապետություն է ներթափանցել Իրաքի տարածքից: Այսպիսով, օգոստոսի, 12-ին եւ 13-ին Արարատյան դաշտավայրում օդի ջերմաստիճանը բարձրացել է 40 աստիճան: Օգոստոսի 13-ին Երեւանում (Արաբկիր կայանում) գրանցվել է 40,6 աստիճան տաքություն, իսկ Էրեբունի օդերեւութաբանական կայանում՝ 40,8 աստիճան:

Ինչ վերաբերում է առաջիկա օրերի կանխատեսումներին, ապա, ըստ Սուրենյանի, առաջիկա հինգ օրերին առանձնապես լուրջ կլիմայական փոփոխություններ չեն սպասվում: Ամենաշոգ օրերը կլինեն օգոստոսի 15-ը եւ 16-ը, երբ օդի ջերմաստիճանը կտատանվի 40-41 աստիճանի սահմաններում: Ի դեպ, 40-41 աստիճանի տեւողությունը, եթե նախորդ շրջանում տեւել է 1-2 ժամ, ապա այս օրերին կերկարի եւ կտեւի ավելի քան 3 ժամ:

«Բացի այդ  սպասվում է գիշերային ջերմաստիճանի բարձրացում: Եթե նախորդ երկու օրերին Երեւանում գիշերային ջերմաստիճանը տատանվել է 22-23 աստիճանի սահմաններում, ապա օգոստոսի 15-16-ին օդի ջերմաստիճանը գիշերը 27-28 աստիճանից չի նվազի:

Օգոստոսի 17-ին եւ 18-ին օդի ջերմաստիճանը 1-ից 2 աստիճանով կնվազի՝ տատանվելով 39-40 ատիճանի սահմաններում: Սակայն օգոստոսի 19-ին օդի ջերմաստիճանը կրկին կբարձրանա, ինչի արդյունքում օգոստոսի 19-ին, 20-ին եւ 21-ին ջերմաստիճանը կհասնի 40-41 աստիճանի:

Ամենաշոգը կլինի Սյունիքի հովտային գոտիներում, մասնավորապես, Մեղրիի ու Ագարակի հատվածում, որտեղ օդի ջերմաստիճանը կբարձրանա մինչեւ 42 աստիճանի: Իսկ ամենազովը կլինի Լոռիում, Շիրակում, Գեղարքունիքում եւ Վայոց Ձորի լեռնային հատվածներում: Թեեւ այդ շրջաններում նույնպես այս օրերին գրանցվել է բարձր ջերմաստիճան:

«Ազգաբնակչությանը հորդորում ենք ցերեկային ժամերին խուսափել ուլտրամանուշակագույն ճառագայթներից, օգտագործեն շատ հեղուկներ եւ օրգանիզմը ազատեն ավելորդ ծանրաբեռբվածությունից, քանի որ եթե օդի ջերմաստիճանը գերազանցում է մարդու մարմնի միջին ջերմաստիճանը, այսինքն՝ 36,5 աստիճանը, ապա օրգանիզմն ընկնում է ջերմային սթրեսի մեջ»,-ամփոփել է նա: