նախընտրելի դարձնելՀՀ վարչապետ Կարեն Կարապետյանի ղեկավարությամբ այսօր տեղի է ունեցել սուբվենցիաներ ստանալու ծրագրային հայտերի գնահատման միջգերատեսչական հանձնաժողովի նիստը:
Կառավարությունից NEWS.am-ին հայտնում են, որ ՀՀ տարածքային կառավարման եւ զարգացման նախարար Դավիթ Լոքյանը ներկայացրել է համայնքներից ստացված սուբվենցիաների ծրագրային 40 հայտերը, որոնց ընդհանուր արժեքը 1 մլրդ 371 մլն դրամ է: Նշված գումարից համայնքների ներդրումը կազմում է 791 միլիոն դրամ, իսկ մնացած մասը պետական աջակցությունն է: Հայտերը վերաբերում են համայնքային նշանակության ծրագրերի, որոնցով, մասնավորապես, նախատեսվում է իրականացնել փողոցային լուսավորություն, կոյուղագծերի կառուցում, փողոցների ու ճանապարհների բարեկարգում ու հիմնանորոգում, մանկական այգու ստեղծում ու համայնքային պուրակների կառուցապատում, մանկապարտեզների վերանորոգում, ջրագծերի կառուցում եւ այլն:
Դավիթ Լոքյանի ներկայացմամբ՝ բոլոր ծրագրերը մանրամասն քննարկվել են շահագրգիռ գերատեսչությունների կողմից, ներկայացվել են համապատասխան առաջարկություններ:
Վարչապետ Կարեն Կարապետյանը կարեւորել է ծրագրերի արդյունավետությունը՝ ընդգծելով, որ պետք է հաշվի առնվեն գերատեսչությունների առաջարկությունները, որպեսզի ձեւավորվեն իրատեսական ծրագրեր: Նա նաեւ հորդորել է խրախուսել ու ամենայն աջակցություն ցուցաբերել արդյունավետ աշխատող եւ իրենց համայնքների զարգացմանն ուղղված ծրագրեր իրականացնող համայնքապետներին:
Քննարկումների ընթացքում որոշվել է վերոնշյալ 40 ծրագրային հայտից 3-ին առայժմ հավանություն չտալ՝ համայնքների կողմից համաֆինանսավորման ոչ բավարար ծավալի պատճառով, որպեսզի վերջիններս կարողանան սահմանված ծավալով կատարել համաֆինանսավորման իրենց պարտավորությունները:
