ՀՀ տրանսպորտի, կապի եւ տեղեկատվական տեխնոլոգիաների նախարարությունում նախարար Աշոտ Հակոբյանի գլխավորությամբ տեղի է ունեցել քաղավիացիայի խնդիրների շուրջ քննարկում` քաղաքացիական ավիացիայի կոմիտեի նախագահ Տաթեւիկ Ռեւազյանի, վարչապետի խորհրդական Սրբուհի Ղազարյանի, ոլորտի մասնագետների եւ շահագրգիռ այլ կողմերի մասնակցությամբ։

Նախարարությունից NEWS.am-ին հայտնում են, որ հանդիպում-քննարկման նպատակն աշխատանքային խումբ ձեւավորելն է, որը կզբաղվի քաղավիացիայի խնդիրների վերհանմամբ, դրանց քննարկմամբ եւ արդյունքում միասնական որոշման կայացման համար առաջարկությունների ներկայացմամբ:

Նախարարի խոսքով` աշխատանքային խումբը պետք է աշխատի թափանցիկ, կամավորության սկզբունքով` տարբեր մասնագետների ներգրավմամբ:

Քաղավիացիայի կոմիտեի նախագահի առաջարկությամբ, հանդիպման ձեւաչափին համապատասխան՝ հայաստանյան ավիաընկերությունների ներկայացուցիչներն ու մասնագետները ներկայացրին իրենց առանձնացրած խնդիրներն ու հանդես եկան առաջարկություններով։

Քննարկման առանցքային թեման ազգային ավիափոխադրող ունենալու հարցն էր, որն, ըստ ներկաների, ոչ միայն անհրաժեշտ է, այլեւ ոլորտի առաջընթացի նախապայման։ Հայաստանում գրանցված ընկերություններն այս պահին 6-ն են, բայց փաստացի դրանցից միայն մեկն է չվերթներ իրականացնում։ «Էյր Արմենիա» ընկերության տնօրենի խոսքով` աշխատանքային այս խմբի գերխնդիրը բոլորին ապացուցելն է, որ Հայաստանին ավիացիան պետք է, եւ ոչ միայն անվտանգության, այլեւ տնտեսական շահավետության տեսանկյունից:

Խոսվեց նաեւ «Զվարթնոց» միջազգային օդանավակայանի շահագործման կոնցեսիոն պայմանագրի խնդիրների շուրջ: «Բարձր սակագներ ու մրցակցության անհավասար պայմաններ. սրանք այդ պայմանագրի վնասակար հետեւանքների մի մասն են միայն»,- կարծում են ավիացիայի ոլորտի ներկայացուցիչները։

Քննարկումը բազմաշերտ էր՝ չշահագործվող օդանավակայաններից մինչեւ Հայաստան մտնող ավիավառելիքի գներ, կոռուպցիոն սխեմաներ ու իրավական բացթողումներ։ Հանդիպմանը ներկա էր նաեւ վարչապետի խորհրդականը, ով էլ ներկայացրեց կառավարության տեսլականն այս ուղղություններով:

Նախարարը հանդիպման ավարտին բոլոր ցանկացողներին առաջարկեց գրանցվել՝ աշխատանքային խմբի գործունեությանը մասնակցելու համար։

Հավելենք, որ գրանցման գործընթացը դեռ ավարտված չէ. քննարկմանը ներկա չգտնված, բայց շահագրգիռ այլ անձինք եւս կարող են կապ հաստատել նախարարության հետ՝ +374 10 590139 հեռախոսահամարով կամ [email protected] էլեկտրոնային փոստով։