նախընտրելի դարձնել
Գյումրիի բժշկական քոլեջի դասախոս, խարդախության մեջ մեղադրվող Կոզետա Կիրակոսյանի վերաբերյալ դատավճիռ է կայացվել:
Շիրակի մարզի ընդհանուր իրավասության դատարանը դասախոսին մեղավոր է ճանաչել Քրեական օրենսգրքի 178-րդ հոդվածի 2-րդ մասի 1.1, 2 եւ 5 կետերով (խարդախությունը, որը կատարվել է պաշտոնեական դիրքն օգտագործելով, խոշոր չափերով եւ կաշառք ստանալու պատրվակով) եւ տուգանել 400 հազար դրամով:
Նշենք, որ ի սկզբանե Կոզետա Կիրակոսյանը մեղադրվում էր առանձնապես խոշոր չափի կաշառք պահանջելու և ստանալու մեջ, սակայն, քրեական գործը դատարան էր ուղարկվել խարդախության մեղադրանքով:
Ըստ մեղադրանքի՝ Կոզետա Կիրակոսյանը ՌԴ-ում բնակվող իր ծանոթ Ա.Բարսեղյանից կաշառք ստանալու պատրվակով 2015-2016թթ ընթացքում մաս-մաս պահանջել և ստացել է 1 մլն 400 հազար դրամ: Նա ներկայացրել է նաեւ 500 ԱՄՆ դոլար ստանալու պահանջ` Ա.Բարսեղյանի դստեր` Վ.Բարսեղյանի օգտին ապօրինի գործողություններ կատարելու համար, այնինչ խոստացված գործողությունները կատարելու կապակցությամբ կամ առհասարակ որևէ հնարավորություն չի ունեցել կամ դրանց կատարման անհրաժեշտությունը բացակայել է:
